Заклік з’яўляецца пачаткам штодзённай літургічнай малітвы. Ён папярэднічае Гадзіне чытанняў або Ютрані, у залежнасці ад таго, якая з гэтых літургічных гадзінаў распачынае малітву дня.

К. Пане, адкрый мае вусны.
Н. І вусны мае будуць абвяшчаць Тваю хвалу.

Ант. Хадземце паклонімся Хрысту Пану, / які дзеля нас прайшоў праз выпрабаванні і пакуты.

Псальм 100 (99)
Радасць тых, хто ўваходзіць у святыню

Пан хоча, каб адкупленыя спявалі песню перамогі (св. Атаназій) 

Усклікай Пану, уся зямля. *
З радасцю служыце Пану.

Станьце перад Яго абліччам *
з радасным спевам.

Ант. Хадземце паклонімся Хрысту Пану, / які дзеля нас прайшоў праз выпрабаванні і пакуты.

Ведайце, што Пан ёсць Богам, *
Ён стварыў нас, і мы Ягоныя.

Мы – Яго народ *
і авечкі Ягонай пашы.

Ант. Хадземце паклонімся Хрысту Пану, / які дзеля нас прайшоў праз выпрабаванні і пакуты.

Уваходзьце ў брамы Яго з падзякаю, †
на дзядзінцы Ягоныя з гімнам хвалы, *
праслаўляйце і благаслаўляйце Яго імя.

Бо Пан ёсць добры, †
навекі Ягоная міласэрнасць, *
і вернасць Яго з пакалення ў пакаленне.

Ант. Хадземце паклонімся Хрысту Пану, / які дзеля нас прайшоў праз выпрабаванні і пакуты.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. Хадземце паклонімся Хрысту Пану, / які дзеля нас прайшоў праз выпрабаванні і пакуты.

К. Божа, прыйдзі мне на дапамогу.
Н. Пане, паспяшы да мяне на паратунак.
Хвала Айцу і Сыну, і Духу Святому.
Як была спрадвеку, цяпер і заўсёды,
І на векі вечныя. Амэн.

Пададзенае вышэй прапускаецца, калі гэтая Гадзіна чытаецца непасрэдна пасля Закліку.

ГІМН

Маем цяпер адпаведны
Дадзены час нам ад Бога,
Каб цераз стрыманасць цела
Аздаравіць свет знямоглы.

Ззяе ўжо ў бляску Хрыстовым
Радасны дзень адкуплення,
Сэрца грахоўныя раны
Пост і малітва залечыць.

Просім, каб мы захавалі
Ўстрыманне цела і духа,
І без маруды імкнулі
Да брамаў пасхі вечнай.

Божа, адзіны ў Тройцы,
Будзь праслаўлёны навекі.
З падзякай за дар прабачэння
Мы новую песню спяваем. Амэн.

ПСАЛЬМОДЫЯ

1 ант. Схілі да мяне сваё вуха, Пане, * каб уратаваць мяне.

Псальм 31 (30), 2-17. 20-25
Даверлівая малітва прыгнечанага

Ойча, у рукі Твае аддаю дух Мой (Лк 23, 46)

І (2-9)

У Цябе, Пане, я шукаю прыстанішча, †
няхай не буду асаромлены навекі, *
у справядлівасці Тваёй збаў мяне.

Схілі да мяне сваё вуха, *
паспяшы, каб уратаваць мяне.

Будзь для мяне каменнай цвярдыняй, †
домам прыстанішча, *
каб уратаваць мяне.

Бо Ты мая скала і мая цвярдыня, *
дзеля імя Твайго кіруй мною і вядзі мяне.

Выцягні мяне з сеткі, якую патаемна паставілі на мяне, *
бо Ты мая цвярдыня.

У рукі Твае аддаю я дух мой; *
Ты мяне адкупіў, Пане, Божа верны.

Ненавіджу тых, хто пакланяецца марным ідалам, *
я ж спадзяюся на Пана.

Весялюся і радуюся міласэрнасці Тваёй, *
бо глянуў Ты на няшчасце маё,

пазнаў нядолю маёй душы †
і не аддаў мяне ў рукі ворага, *
але паставіў мае ногі на прасторным месцы.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

1 ант. Схілі да мяне сваё вуха, Пане, * каб уратаваць мяне.

2 ант. Няхай заззяе аблічча Тваё, Пане, * над слугою Тваім.

ІІ (10-17)

Змілуйся нада мною, Пане, бо я ва ўціску, †
высахла ад жалю маё вока, *
мая душа і нутро маё.

Мінае сярод суму жыццё маё, *
а гады мае – сярод стогну;

ад правінаў маіх захісталася мая моц, *
і косткі мае павысыхалі.

Для ўсіх ворагаў маіх я стаў пасмешышчам, †
нават для суседзяў маіх, *
жахам для знаёмых маіх.

Хто бачыць мяне на вуліцы, уцякае ад мяне. †
Забыты я ў сэрцах, як памерлы, *
я падобны да разбітага начыння.

Бо чую пагалоскі многіх; *
страх навокал;

яны змаўляюцца супраць мяне, *
задумваюць забраць маё жыццё.

Спадзяюся на Цябе, Пане, †
я кажу: «Ты мой Бог, *
у Тваіх руках дні мае».

Вызвалі мяне з рук ворагаў маіх і ганіцеляў; †
няхай свеціць аблічча Тваё над слугою Тваім, *
збаў мяне ў сваёй ласкавасці.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

2 ант. Няхай заззяе аблічча Тваё, Пане, * над слугою Тваім.

3 ант. Благаслаўлёны Пан, * які паказаў мне сваю цудоўную ласкавасць.

ІІІ (20-25)

Якая ж вялікая Твая дабрыня, *
якую Ты захаваў для тых, хто Цябе баіцца,

якую Ты падрыхтаваў тым, *
хто на Цябе спадзяецца перад чалавечымі сынамі.

Пад покрывам аблічча свайго *
Ты хаваеш іх ад змоў людскіх.

Хаваеш іх, як у шатры, *
ад сварлівых языкоў.

Благаслаўлёны Пан, †
які паказаў мне сваю цудоўную ласкавасць *
у горадзе ўмацаваным.

Я сказаў у страху сваім: *
«Я адкінуты ад вачэй Тваіх», –

але Ты пачуў голас малітвы маёй, *
калі я клікаў Цябе.

Любіце Пана, усе Ягоныя святыя; *
Пан ахоўвае верных,

а таму, хто паступае ганарліва, *
з лішкам вяртае.

Будзьце мужнымі, няхай будзе моцным сэрца вашае, *
усе, хто спадзяецца на Пана.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

3 ант. Благаслаўлёны Пан, * які паказаў мне сваю цудоўную ласкавасць.

К. Кайцеся і верце ў Евангелле.
Н. Бо наблізілася Божае Валадарства.

ПЕРШАЕ ЧЫТАННЕ
Кніга Зыходу 14, 10-31

Пераход праз Чырвонае мора

У тыя дні: Фараон наблізіўся, а сыны Ізраэля, узняўшы вочы свае, убачылі, што егіпцяне ідуць за імі. Сыны Ізраэля вельмі спалохаліся і ўсклікнулі да Пана. Яны сказалі Майсею: «Ці ж няма грабніц у Егіпце, што ты прывёў нас паміраць у пустыні? Што гэта ты зрабіў нам, што вывеў нас з Егіпта? Ці ж не тое самае гаварылі мы табе ў Егіпце, кажучы: Пакінь нас, няхай мы будзем працаваць на егіпцянаў, бо лепш нам быць у егіпецкай няволі, чым памерці ў пустыні». Але Майсей сказаў народу: «Не бойцеся, заставайцеся – і ўбачыце выратаванне ад Пана, якое ўчыніць вам сёння, бо егіпцянаў, якіх вы бачыце сёння, больш не ўбачыце ніколі. Пан будзе змагацца за вас, а вы будзьце спакойныя».

Сказаў Пан Майсею: «Чаму ты ўсклікаеш да Мяне? Скажы сынам Ізраэля, няхай выходзяць. А ты падымі кій свой і працягні руку сваю да мора, і падзялі яго, і пойдуць сыны Ізраэля праз сярэдзіну мора па сушы. Я ж зраблю жорсткім сэрца егіпцянаў, каб пайшлі яны ўслед за імі. І пакажу славу Маю на фараоне і ўсім войску ягоным, на калясніцах і вершніках ягоных. І даведаюцца егіпцяне, што Я – Пан, калі пакажу славу Маю на фараоне і ўсім войску ягоным, на калясніцах і вершніках ягоных».

І зрушыўся анёл Божы, які ішоў перад войскам Ізраэля, і пайшоў за ім, таксама і слуп воблачны перасунуўся спераду назад; стаў паміж войскам егіпецкім і войскам ізраэльскім; і была хмара цёмная для адных, і асвятляла ноч другім так, што не маглі ўсю ноч падысці адзін да аднаго.

Калі Майсей працягнуў руку да мора, Пан гнаў мора моцным усходнім ветрам усю ноч і ператварыў у сушу, і раздзялілася вада. Тады пайшлі сыны Ізраэля праз сярэдзіну мора па сушы; вада была для іх сцяною з правага і з левага боку. І пагналіся егіпцяне, і ўвайшла за імі ў сярэдзіну мора ўся конніца фараона, калясніцы і вершнікі ягоныя. І вось на світанні Пан паглядзеў на войска егіпцянаў са слупа вогненнага і воблачнага, і прывёў у замяшанне войска іхняе. І падвярнуў колы калясніцаў, што ім цяжка было рухацца. І казалі егіпцяне: «Уцякайма ад Ізраэля, бо Пан ваюе за іх супраць егіпцянаў».

Тады сказаў Пан Майсею: «Працягні руку сваю да мора, каб павярнуліся воды да егіпцянаў, на калясніцы і вершнікаў іхніх». І калі Майсей працягнуў руку да мора, на самым світанні яно вярнулася на сваё месца, і бегла вада насустрач егіпцянам, якія ўцякалі, і патапіў іх Пан сярод хваляў. Вярнулася вада і накрыла калясніцы і вершнікаў усяго войска фараона, якое ўвайшло за імі ў мора, і не засталося ніводнага з іх. А сыны Ізраэля прайшлі праз сярэдзіну мора па сушы, і вада стаяла каля іх сцяною з левага і з правага боку.

У той дзень вызваліў Пан Ізраэль з рук егіпецкіх. І ўбачылі ізраэльцяне мёртвых егіпцянаў на беразе мора. Убачылі моцную руку, якую Пан узняў супраць егіпцянаў. Спалохаўся народ Пана і паверыў Пану і Майсею, слугу Ягонаму.

РЭСПАНСОРЫЙ Зых 15, 1. 2. 3.
Н. Спяваю Пану, бо Ён узвысіўся, каня і вершніка скінуў у мора. * Пан мая сіла і мая песня, Ён стаў маім збаўленнем.
К. Пан магутны ў барацьбе, Яго імя – Усемагутны.
Н. Пан мая сіла і мая песня, Ён стаў маім збаўленнем.

ДРУГОЕ ЧЫТАННЕ
Катэхеза св. Яна Хрызастома, біскупа

(Cat. 3, 24-27: SC 50, 165-167)
Майсей і Хрыстус

Габрэі бачылі цуды, і ты таксама ўбачыш, і больш велічныя і цудоўныя, чым габрэі падчас выйсця з Егіпта. Ты не бачыў фараона і яго патопленыя войскі, але бачыў д’ябла, кінутага ў вір разам з ягонымі войскамі. Сыны Ізраэля перайшлі Чырвонае мора, ты перайшоў смерць. Яны былі ўратаваныя ад Егіпта, ты – ад дэманаў. Габрэі пакінулі рабскае служэнне чужынцам, ты – нашмат больш сумнае рабства граху.

Ці хочаш даведацца, чаму ты ўшанаваны яшчэ большымі дарамі? Габрэі не маглі тады сузіраць услаўлены твар Майсея, які аднак быў разам з імі нявольнікам і належаў да іхняга роду, а ты бачыў Хрыстова аблічча ў славе Ягонай. Таму Павел усклікае, кажучы: «Мы з адкрытым тварам ўглядаемся ў славу Пана» (пар. 2 Кар 3, 18).

Разам з габрэямі ішоў тады Хрыстус, аднак яшчэ больш праўдзіва Ён ідзе цяпер з намі; бо тады Пан суправаджаў іх праз ласку, дадзеную Майсею, а цяпер спадарожнічае нам не толькі праз ласку Майсея, але таксама дзякуючы вашай паслухмянасці. Пасля выйсця з Егіпта яны апынуліся ў пустыні, а цябе пасля смерці чакае неба. Выдатным правадыром і ўладаром для іх быў Майсей, а для нас – іншы Майсей, сам Бог, Правадыр і Валадар.

Чым жа адзначаўся Майсей? Як кажа Святое Пісанне, гэта быў самы лагодны з усіх людзей, якія жылі на зямлі (пар. Ліч 12, 3). Гэтую рысу мы можам беспамылкова прыпісаць нашаму Майсею, бо Ён мае ў сабе наймілейшага і глыбока адзінасутнага з Ім Духа. Майсей узносіў рукі ў неба, адкуль выпрошваў манну – спажытак анёлаў; а наш Майсей уздымае рукі да неба і прыносіць нам вечны спажытак. Той Майсей ударыў у скалу і адкрыў струмень вады; гэты дакранаецца да алтара, б’е ў духоўны стол і выпускае з яго крыніцы Духа. Таму пасярод гэтага стала ёсць нібы крыніца, каб адусюль да гэтай крыніцы сыходзіліся статкі і ажыўляліся яе збаўчымі водамі.

Паколькі ў нас ёсць такая крыніца і такое багацце жыцця, а наш стол перапаўняецца незлічонымі дабротамі і ўзбагачае нас духоўнымі дарамі, будзем са шчырым сэрцам і чыстым сумленнем падыходзіць да яе, каб у адпаведны час атрымаць ласку міласэрнасці. Ласка і міласэрнасць Адзінароднага Сына, нашага Пана і Збаўцы Езуса Хрыста, праз якога і з якім Айцу і жыватворнаму Духу слава, пашана і ўлада цяпер, і заўсёды, і на вечныя вякі. Амэн.

РЭСПАНСОРЫЙ пар. Гбр 11, 24-25. 26. 27
Н. Майсей праз веру стаў вялікім, ён не хацеў, каб яго лічылі сынам дачкі фараона; пажадаў цярпець з народам Божым, а не мець асалоду ад часовага граху, * бо ён спадзяваўся на будучую ўзнагароду.
К. Лічыў большым багаццем, чым усе скарбы Егіпта, цярпець знявагі дзеля Хрыста, і дзякуючы веры пакінуў Егіпет.
Н. Бо ён спадзяваўся на будучую ўзнагароду.

МАЛІТВА

Божа, Ты наказаў нам утаймоўваць целы, каб вылечыць душы, дай, просім, каб маглі мы пазбегнуць усялякага граху і верна трымацца запаведзяў Тваёй любові. Праз Пана нашага Езуса Хрыста, Твайго Сына, які з Табою жыве і валадарыць у еднасці Духа Святога, Бог, праз усе вякі вечныя. Амэн.

Потым, прынамсі пры супольнай цэлебрацыі, дадаецца акламацыя:

К. Благаславім Пана.
Н. Дзякуем Пану Богу.

К. Божа, прыйдзі мне на дапамогу.
Н. Пане, паспяшы да мяне на паратунак.
Хвала Айцу і Сыну, і Духу Святому.
Як была спрадвеку, цяпер і заўсёды,
І на векі вечныя. Амэн.

Пададзенае вышэй прапускаецца, калі гэтая Гадзіна чытаецца непасрэдна пасля Закліку.

ГІМН

О Хрыстэ, сонца справядлівасці,
Няхай змрок цемры ўжо расступіцца,
Каб моц святла да нас вярнулася,
Калі зямлю ізноў адновіш Ты.

Цяпер даеш час адпаведны нам,
Напоўні сэрцы шчырай скрухаю.
Няхай да жалю схіліць грэшнікаў
Твая любоў шматміласцівая.

Дапамажы шчыра пакаяцца,
Каб праз Твае дары нязмерныя
Правіны нам былі адпушчаны,
Бо Ты – крыніца міласэрнасці.

Дзень надыходзіць, дзень Твой, Пане наш,
Праз бляск якога заквітнее ўсё,
Агорне нас вялікай радасцю,
Бо ў ім адорыш нас дабротамі.

Няхай сусвет Табе паклоніцца,
О Божа ў Тройцы, поўны міласці,
А мы, адноўленыя ласкаю,
Табе спяваем песню новую. Амэн.

ПСАЛЬМОДЫЯ

1 ант. Калі я пайду * і з’яўлюся перад Божым абліччам?

Псальм 42 (41)
Туга па Богу і Ягонай святыні

Хто прагне, няхай прыйдзе, і хто хоча, няхай возьме ваду жыцця дарма (Ап 22, 17)

Як лань прагне вады з патоку, *
так душа мая прагне Цябе, Божа.

Душа мая прагне Бога, *
Бога жывога.

Калі я пайду *
і з’яўлюся перад Божым абліччам?

Слёзы мае былі для мяне хлебам удзень і ўначы, *
калі мне штодня казалі: «Дзе твой Бог?»

Успамінаючы гэта, я праліваю душу маю, *
бо я ўваходзіў са святочнай грамадой

у цудоўны шацёр, у Дом Божы *
сярод воклічаў радасці і з падзякаю.

Чаму, душа мая, ты сумуеш, *
чаго ты ўва мне стогнеш?

Спадзявайся на Бога, бо яшчэ буду славіць Яго, *
збаўленне майго аблічча і майго Бога.

Засумавала ўва мне душа мая, †
таму я ўспамінаю Цябе *
з краіны Ярдана і Гермона, з гары Місар.

Бездань кліча бяздонне гулам Тваіх вадаспадаў; *
усе Твае воды і хвалі Твае прайшлі нада мною.

Удзень Пан пасылае сваю міласэрнасць, †
і ноччу песня пра Яго са мною, *
малітва да Бога майго жыцця.

Кажу Богу, цвярдыні маёй: *
«Чаму Ты забыўся пра мяне?

Чаму хаджу я ў смутку, *
прыгнечаны ворагам?»

Нібы ломяцца мае косткі, *
калі кпяць з мяне ворагі мае,

калі кажуць штодня: *
«Дзе твой Бог?»

Чаму сумуеш, душа мая, *
чаго ты ўва мне стогнеш?

Спадзявайся на Бога, бо яшчэ буду славіць Яго, *
збаўленне майго аблічча і майго Бога.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

1 ант. Калі я пайду * і з’яўлюся перад Божым абліччам?

2 ант. Пакажы нам, Пане, * святло сваёй міласэрнасці.

Песня (Сір 36, 1-7. 13-16)
Малітва за святы горад Ерузалем

Вечнае жыццё ў тым, каб пазналі Цябе, адзінага праўдзівага Бога, і таго, каго Ты паслаў, Езуса Хрыста (Ян 17, 3)

Змілуйся над намі, Пане, Божа сусвету, і паглядзі на нас, *
навядзі на ўсе народы страх перад Табою.

Працягні руку супраць чужых народаў, *
каб яны ўбачылі магутнасць Тваю.

Бо, як праз нас Ты паказаў ім сваю святасць, *
так праз іх пакажы нам сваю веліч.

Няхай яны спазнаюць, як і мы спазналі, *
што няма Бога, апроч Цябе, Пане.

Аднаві знакі і паўтары цуды, *
праслаў сваю руку і правіцу.

Збяры ўсе пакаленні Якуба *
і вазьмі іх у спадчыну, як ад пачатку.

Змілуйся, Пане, над народам, які названы Тваім імем, *
і над Ізраэлем, якога Ты прыраўняў да першынца.

Змілуйся над сваім горадам святым, *
над Ерузалемам, месцам Твайго адпачынку.

Напоўні Сіён праслаўленнем Тваіх цнотаў, *
а народ Твой – сваёю славаю.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

2 ант. Пакажы нам, Пане, * святло сваёй міласэрнасці.

3 ант. Благаслаўлёны Ты, Пане, * на скляпенні неба.

Псальм 19 (18), 2-7
Хвала Богу, Стварыцелю сусвету

Наведаў нас Усход з вышыні, каб накіраваць ногі нашыя на шлях спакою (Лк 1, 78. 79)

Нябёсы абвяшчаюць Божую славу, *
пра справу рук Яго расказвае небасхіл.

Дзень дню апавядае слова, *
ноч ночы адкрывае веды.

Няма мовы, і няма слоў, *
але чуецца іх голас.

Па ўсёй зямлі разыходзіцца іх голас, †
і да межаў сусвету – словы іхнія; *
для сонца там шацёр у іх.

Як малады, яно выходзіць †
са свайго шлюбнага пакоя, *
радуецца, быццам асілак, які збіраецца бегчы.

Яно ўзыходзіць на адным краі неба, †
і бег ягоны – аж да другога краю, *
і нішто не схаваецца ад ягонага жару.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

3 ант. Благаслаўлёны Ты, Пане, * на скляпенні неба.

КАРОТКАЕ ЧЫТАННЕ Зых 19, 4-6а
Вы самі бачылі, што Я зрабіў егіпцянам і як насіў вас на арліных крылах, і прывёў вас да сябе. Цяпер, калі будзеце слухацца голасу Майго і захоўваць запавет Мой, то станеце Маёй уласнасцю сярод усіх народаў, бо Мая ўся зямля. І вы будзеце для Мяне валадарствам святароў і народам святым.

КАРОТКІ РЭСПАНСОРЫЙ
К. Пан вызваліць мяне * ад пасткі паляўнічых.
Н. Пан вызваліць мяне * ад пасткі паляўнічых.
К. І ад злога слова.
Н. Ад пасткі паляўнічых.
К. Хвала Айцу і Сыну, і Духу Святому.
Н. Пан вызваліць мяне * ад пасткі паляўнічых.

ПЕСНЯ З ЕВАНГЕЛЛЯ

Ант. да песні Захарыі: Будзьце міласэрнымі, * як і Айцец ваш міласэрны, – кажа Пан.

Песня Захарыі (Лк 1, 68-79)
Месія і Яго папярэднік

Благаслаўлёны Пан, Бог Ізраэля, *
бо наведаў і адкупіў народ свой,

і ўзняў моц збаўлення для нас *
у доме Давіда, слугі свайго.

Як абвясціў спрадвеку *
вуснамі сваіх святых прарокаў,

што збавіць нас ад ворагаў нашых *
і ад рук усіх, хто нас ненавідзіць.

Каб праявіць міласэрнасць да айцоў нашых *
і нагадаць пра святы запавет свой.

Прысягу, якую даў Абрагаму, айцу нашаму, *
дасць нам.

Каб, выбаўленыя з рук ворагаў, *
мы без страху служылі Яму

ў святасці і справядлівасці перад Ім *
ва ўсе дні нашыя.

А ты, дзіцятка, прарокам Найвышэйшага будзеш названа, *
бо пойдзеш прад абліччам Пана падрыхтаваць шляхі Яму,

каб даць народу Ягонаму пазнаць збаўленне *
праз адпушчэнне яго грахоў,

дзякуючы сардэчнай міласэрнасці нашага Бога,*
у якой наведаў нас Усход з вышыні;

каб асвятліць тых, *
хто сядзіць у цемры і ў цені смяротным;

каб накіраваць ногі нашыя *
на шлях спакою.

Хвала Айцу і Сыну, *
І Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. да песні Захарыі: Будзьце міласэрнымі, * як і Айцец ваш міласэрны, – кажа Пан.

ПРОСЬБЫ

Благаслаўляем Бога Айца, дзякуючы шчодрасці якога мы можам у гэты дзень Вялікага посту прынесці Яму ахвяру хвалы, і просім Яго:
Навучы нас, Пане, сваёй Божай мудрасці.

Усемагутны і міласэрны Божа, дай нам духа малітвы і пакаяння,
– каб мы ўзрасталі ў любові да Цябе і да людзей.

Дапамажы нам супрацоўнічаць з Табою, каб усё абнавілася ў Хрысце,
– а спакой і справядлівасць перапоўнілі зямлю.

Адкрый нам глыбокую каштоўнасць усяго стварэння,
– каб разам з ім мы праслаўлялі Цябе песняй хвалы.

Даруй нам, што мы не заўсёды заўважаем Хрыста ў бедных, няшчасных і гаротных
– і не ўшаноўваем Твайго Сына ў гэтых нашых братах.

Ойча наш.

МАЛІТВА

Божа, Ты наказаў нам утаймоўваць целы, каб вылечыць душы, дай, просім, каб маглі мы пазбегнуць усялякага граху і верна трымацца запаведзяў Тваёй любові. Праз Пана нашага Езуса Хрыста, Твайго Сына, які з Табою жыве і валадарыць у еднасці Духа Святога, Бог, праз усе вякі вечныя. Амэн.

Потым, калі прысутнічае святар або дыякан, ён рассылае народ, кажучы:

Пан з вамі.
Н. І з духам тваім.
Няхай благаславіць вас Бог усемагутны, Айцец і Сын, і Дух Святы.
Н. Амэн.

Калі адбываецца рассыланне народу, дадаецца заклік:

Ідзіце ў супакоі Хрыста.
Н. Дзякуем Пану Богу.

Калі святар або дыякан адсутнічаюць ці калі Гадзіна чытаецца індывідуальна, то яна завяршаецца наступным чынам:

Няхай Пан благаславіць нас, абароніць ад усялякага зла і давядзе да жыцця вечнага.
Н. Амэн.

К. Божа, прыйдзі мне на дапамогу.
Н. Пане, паспяшы да мяне на паратунак.
Хвала Айцу і Сыну, і Духу Святому.
Як была спрадвеку, цяпер і заўсёды,
І на векі вечныя. Амэн.

ГІМН

З верай у Бога, якою жывём мы,
З моцнай, трывалай надзеяй у сэрцы,
Умацаваныя ласкай любові,
Разам Хрыстову хвалу абвяшчаем.

Жорсткія каты а трэцяй гадзіне
Пана вялі на жахлівую муку.
Церпячы жудасць крыжовага дрэва,
Ён заблукалую збавіў авечку.

Молім з пакораю добрага Пана,
Што адкупіў нас ахвярай сваёю,
Каб захаваў ад грахоў і заганаў
Тых, каго вызваліў з моцаў пякельных.

Просім Хрыста і Айца разам з Духам –
Усемагутную Тройцу Святую,
Каб падтрымала ўсіх Божаю ласкай,
Хто ў малітве стаіць перад Панам. Амэн.

ПСАЛЬМОДЫЯ

Ант. Прыйшлі для нас дні пакаяння * дзеля адкуплення грахоў і збаўлення душ.

Псальм 119 (118), 41-48
VI (Вав)

Пане, няхай сыдзе на мяне Твая ласкавасць *
і Тваё збаўленне паводле Твайго слова,

каб я мог адказаць таму, хто зневажае мяне, *
бо я даверыўся Твайму слову.

Не забірай ніколі з маіх вуснаў слова праўды, *
бо спадзяюся на Твае прысуды.

І буду захоўваць закон Твой *
заўсёды і на векі вечныя.

І буду хадзіць па шырокім прасторы, *
бо я шукаю наказаў Тваіх.

Буду расказваць перад каралямі пра Твае сведчанні *
і не буду саромецца.

Буду цешыцца запаведзямі Тваімі, *
якія ўмілаваў я.

Рукі мае ўздыму да запаведзяў Тваіх, якія палюбіў, *
і буду разважаць над Тваімі пастановамі.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Псальм 40 (39), 2-14. 17-18
Падзяка і просьба аб дапамозе

Ахвяры і прынашэння Ты не захацеў, але цела падрыхтаваў Мне (Гбр 10, 5)

І (2-9)

Я цвёрда спадзяваўся на Пана, *
і Ён схіліўся нада мною, і пачуў мой крык.

Падняў мяне з ямы пагібелі, з балоцістай багны, *
паставіў на скале мае ногі, умацаваў крокі мае.

І паклаў у мае вусны новую песню, *
спеў хвалы нашаму Богу.

Многія ўбачаць і спалохаюцца, *
і будуць спадзявацца на Пана.

Шчаслівы чалавек, які спадзяецца на Пана *
і не звяртаецца да ганарыстых і схільных да маны.

Ты шмат учыніў, Пане, Божа мой, †
у Тваіх цудах і намерах наконт нас *
ніхто не зраўнаецца з Табою.

Я хацеў іх абвясціць і расказаць пра іх, *
але іх колькасці нельга ахапіць.

Ахвяры і прынашэння Ты не пажадаў, *
але адкрыў мне вушы.

Усеспалення і ахвяры за грэх Ты не патрабуеш. *
Тады сказаў я: «Вось іду.

У пачатку кнігі напісана пра мяне. †
Я пажадаў спаўняць Тваю волю, мой Божа, *
і Твае законы жывуць у сэрцы маім».

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

ІІ (10-14. 17-18)

Я абвяшчаў Тваю справядлівасць на вялікім сходзе *
і не закрываў вуснаў сваіх, Ты гэта ведаеш, о Пане.

Справядлівасць Тваю не хаваў я ў сэрцы сваім, *
я абвяшчаў Тваю вернасць і Тваё збаўленне.

Я не таіў Тваёй міласэрнасці і вернасці *
перад вялікай грамадой.

Ты, Пане, не стрымлівай міласэрнасці сваёй ад мяне, †
няхай Твая ласка і вернасць *
заўсёды падтрымліваюць мяне.

Бо мяне атачылі няшчасці, *
якім няма ліку,

дасягнулі мяне беззаконні мае, *
я не магу іх бачыць.

Іх больш, чым валасоў на маёй галаве, *
таму сэрца маё пакідае мяне.

Будзь прыхільны, Пане, уратуй мяне; *
Пане, паспяшайся мне на дапамогу.

Няхай весяляцца і радуюцца Табою тыя, *
хто шукае Цябе,

і тыя, хто любіць збаўленне Тваё, *
няхай гавораць: «Вялікі ёсць Пан».

Я няшчасны і ўбогі, *
але Пан пра мяне дбае.

Ты – дапамога мая і мой абаронца, *
Божа мой, не спазняйся.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. Прыйшлі для нас дні пакаяння * дзеля адкуплення грахоў і збаўлення душ.

КАРОТКАЕ ЧЫТАННЕ Мдр 11, 23-24а
Пане, Ты літуешся над усімі, бо ўсё можаш і не зважаеш на грахі людзей, каб яны маглі навярнуцца. Ты любіш усё, што існуе, і нічым, што стварыў, не грэбуеш.

К. Чыстае сэрца ствары ўва мне, Божа.
Н. І дух моцны аднаві ўва мне.

МАЛІТВА

Божа, Ты наказаў нам утаймоўваць целы, каб вылечыць душы, дай, просім, каб маглі мы пазбегнуць усялякага граху і верна трымацца запаведзяў Тваёй любові. Праз Хрыста, Пана нашага. Амэн.

К. Благаславім Пана.
Н. Дзякуем Пану Богу.

К. Божа, прыйдзі мне на дапамогу.
Н. Пане, паспяшы да мяне на паратунак.
Хвала Айцу і Сыну, і Духу Святому.
Як была спрадвеку, цяпер і заўсёды,
І на векі вечныя. Амэн.

ГІМН

У гэту гадзіну Збавіцель
Цярпеў на крыжы ад смагі;
Хай тым, хто Яго праслаўляе,
Пан дасць справядлівасці смагу.

Хай Хрыстус іх голадам стане,
Які сам сабою натоліць;
Няхай дасць агіду да грэху,
Імкненне да цноты праўдзівай.

Няхай ласка Духа Святога
Натхняе таго, хто папросіць,
Каб згасла пажадлівасць цела
І ў духу агонь разгарэўся.

Айца і адзінага Сына,
І Духа Святога мы просім,
Каб тых падтрымалі, хто верна
Стаіць у малітве прад Панам. Амэн.

ПСАЛЬМОДЫЯ

Ант. Я жывы, – кажа Пан, – * і хачу не смерці грэшніка, / але каб ён навярнуўся і жыў.

Псальм 119 (118), 41-48
VI (Вав)

Пане, няхай сыдзе на мяне Твая ласкавасць *
і Тваё збаўленне паводле Твайго слова,

каб я мог адказаць таму, хто зневажае мяне, *
бо я даверыўся Твайму слову.

Не забірай ніколі з маіх вуснаў слова праўды, *
бо спадзяюся на Твае прысуды.

І буду захоўваць закон Твой *
заўсёды і на векі вечныя.

І буду хадзіць па шырокім прасторы, *
бо я шукаю наказаў Тваіх.

Буду расказваць перад каралямі пра Твае сведчанні *
і не буду саромецца.

Буду цешыцца запаведзямі Тваімі, *
якія ўмілаваў я.

Рукі мае ўздыму да запаведзяў Тваіх, якія палюбіў, *
і буду разважаць над Тваімі пастановамі.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Псальм 40 (39), 2-14. 17-18
Падзяка і просьба аб дапамозе

Ахвяры і прынашэння Ты не захацеў, але цела падрыхтаваў Мне (Гбр 10, 5)

І (2-9)

Я цвёрда спадзяваўся на Пана, *
і Ён схіліўся нада мною, і пачуў мой крык.

Падняў мяне з ямы пагібелі, з балоцістай багны, *
паставіў на скале мае ногі, умацаваў крокі мае.

І паклаў у мае вусны новую песню, *
спеў хвалы нашаму Богу.

Многія ўбачаць і спалохаюцца, *
і будуць спадзявацца на Пана.

Шчаслівы чалавек, які спадзяецца на Пана *
і не звяртаецца да ганарыстых і схільных да маны.

Ты шмат учыніў, Пане, Божа мой, †
у Тваіх цудах і намерах наконт нас *
ніхто не зраўнаецца з Табою.

Я хацеў іх абвясціць і расказаць пра іх, *
але іх колькасці нельга ахапіць.

Ахвяры і прынашэння Ты не пажадаў, *
але адкрыў мне вушы.

Усеспалення і ахвяры за грэх Ты не патрабуеш. *
Тады сказаў я: «Вось іду.

У пачатку кнігі напісана пра мяне. †
Я пажадаў спаўняць Тваю волю, мой Божа, *
і Твае законы жывуць у сэрцы маім».

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

ІІ (10-14. 17-18)

Я абвяшчаў Тваю справядлівасць на вялікім сходзе *
і не закрываў вуснаў сваіх, Ты гэта ведаеш, о Пане.

Справядлівасць Тваю не хаваў я ў сэрцы сваім, *
я абвяшчаў Тваю вернасць і Тваё збаўленне.

Я не таіў Тваёй міласэрнасці і вернасці *
перад вялікай грамадой.

Ты, Пане, не стрымлівай міласэрнасці сваёй ад мяне, †
няхай Твая ласка і вернасць *
заўсёды падтрымліваюць мяне.

Бо мяне атачылі няшчасці, *
якім няма ліку,

дасягнулі мяне беззаконні мае, *
я не магу іх бачыць.

Іх больш, чым валасоў на маёй галаве, *
таму сэрца маё пакідае мяне.

Будзь прыхільны, Пане, уратуй мяне; *
Пане, паспяшайся мне на дапамогу.

Няхай весяляцца і радуюцца Табою тыя, *
хто шукае Цябе,

і тыя, хто любіць збаўленне Тваё, *
няхай гавораць: «Вялікі ёсць Пан».

Я няшчасны і ўбогі, *
але Пан пра мяне дбае.

Ты – дапамога мая і мой абаронца, *
Божа мой, не спазняйся.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. Я жывы, – кажа Пан, – * і хачу не смерці грэшніка, / але каб ён навярнуўся і жыў.

КАРОТКАЕ ЧЫТАННЕ Эзх 18, 23
Ці ж Я жадаю смерці грэшніка, – кажа Пан Бог, – а не таго, каб адвярнуўся ад шляхоў сваіх і жыў?

К. Адвярні сваё аблічча ад маіх грахоў.
Н. І знішчы ўсе мае беззаконні.

МАЛІТВА

Божа, Ты наказаў нам утаймоўваць целы, каб вылечыць душы, дай, просім, каб маглі мы пазбегнуць усялякага граху і верна трымацца запаведзяў Тваёй любові. Праз Пана нашага Езуса Хрыста, Твайго Сына, які з Табою жыве і валадарыць у еднасці Духа Святога, Бог, праз усе вякі вечныя. Амэн.

К. Благаславім Пана.
Н. Дзякуем Пану Богу.

К. Божа, прыйдзі мне на дапамогу.
Н. Пане, паспяшы да мяне на паратунак.
Хвала Айцу і Сыну, і Духу Святому.
Як была спрадвеку, цяпер і заўсёды,
І на векі вечныя. Амэн.

ГІМН

Распачалася святая гадзіна,
Збаўца яе асвяціў сваёй смерцю;
Мы, заклікаючы імя Хрыстова,
Просім пакорна аб прабачэнні.

Хрыстус злачынцу на крыжы прабачыў,
Узрушаны шчырым ягоным вызнаннем.
Хай жа і наша ахвярнасць, малітвы
Выпрасяць нам прабачэнне правінаў.

Пан перамог крыжам смерць і цемру;
Змрок адышоў, і святло ўжо заззяла.
Жудасны грэх няхай знішчаны будзе,
А чысты бляск нашы душы напоўніць.

Просім Хрыста і Айца разам з Духам –
Усемагутную Тройцу Святую,
Каб падтрымала ўсіх Божаю ласкай,
Хто ў малітве стаіць перад Панам. Амэн.

ПСАЛЬМОДЫЯ

Ант. Умацаваныя Божай ласкай, * будзем працаваць над сабой з вялікай цярплівасцю.

Псальм 119 (118), 41-48
VI (Вав)

Пане, няхай сыдзе на мяне Твая ласкавасць *
і Тваё збаўленне паводле Твайго слова,

каб я мог адказаць таму, хто зневажае мяне, *
бо я даверыўся Твайму слову.

Не забірай ніколі з маіх вуснаў слова праўды, *
бо спадзяюся на Твае прысуды.

І буду захоўваць закон Твой *
заўсёды і на векі вечныя.

І буду хадзіць па шырокім прасторы, *
бо я шукаю наказаў Тваіх.

Буду расказваць перад каралямі пра Твае сведчанні *
і не буду саромецца.

Буду цешыцца запаведзямі Тваімі, *
якія ўмілаваў я.

Рукі мае ўздыму да запаведзяў Тваіх, якія палюбіў, *
і буду разважаць над Тваімі пастановамі.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Псальм 40 (39), 2-14. 17-18
Падзяка і просьба аб дапамозе

Ахвяры і прынашэння Ты не захацеў, але цела падрыхтаваў Мне (Гбр 10, 5)

І (2-9)

Я цвёрда спадзяваўся на Пана, *
і Ён схіліўся нада мною, і пачуў мой крык.

Падняў мяне з ямы пагібелі, з балоцістай багны, *
паставіў на скале мае ногі, умацаваў крокі мае.

І паклаў у мае вусны новую песню, *
спеў хвалы нашаму Богу.

Многія ўбачаць і спалохаюцца, *
і будуць спадзявацца на Пана.

Шчаслівы чалавек, які спадзяецца на Пана *
і не звяртаецца да ганарыстых і схільных да маны.

Ты шмат учыніў, Пане, Божа мой, †
у Тваіх цудах і намерах наконт нас *
ніхто не зраўнаецца з Табою.

Я хацеў іх абвясціць і расказаць пра іх, *
але іх колькасці нельга ахапіць.

Ахвяры і прынашэння Ты не пажадаў, *
але адкрыў мне вушы.

Усеспалення і ахвяры за грэх Ты не патрабуеш. *
Тады сказаў я: «Вось іду.

У пачатку кнігі напісана пра мяне. †
Я пажадаў спаўняць Тваю волю, мой Божа, *
і Твае законы жывуць у сэрцы маім».

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

ІІ (10-14. 17-18)

Я абвяшчаў Тваю справядлівасць на вялікім сходзе *
і не закрываў вуснаў сваіх, Ты гэта ведаеш, о Пане.

Справядлівасць Тваю не хаваў я ў сэрцы сваім, *
я абвяшчаў Тваю вернасць і Тваё збаўленне.

Я не таіў Тваёй міласэрнасці і вернасці *
перад вялікай грамадой.

Ты, Пане, не стрымлівай міласэрнасці сваёй ад мяне, †
няхай Твая ласка і вернасць *
заўсёды падтрымліваюць мяне.

Бо мяне атачылі няшчасці, *
якім няма ліку,

дасягнулі мяне беззаконні мае, *
я не магу іх бачыць.

Іх больш, чым валасоў на маёй галаве, *
таму сэрца маё пакідае мяне.

Будзь прыхільны, Пане, уратуй мяне; *
Пане, паспяшайся мне на дапамогу.

Няхай весяляцца і радуюцца Табою тыя, *
хто шукае Цябе,

і тыя, хто любіць збаўленне Тваё, *
няхай гавораць: «Вялікі ёсць Пан».

Я няшчасны і ўбогі, *
але Пан пра мяне дбае.

Ты – дапамога мая і мой абаронца, *
Божа мой, не спазняйся.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. Умацаваныя Божай ласкай, * будзем працаваць над сабой з вялікай цярплівасцю.

КАРОТКАЕ ЧЫТАННЕ Іс 58, 6а. 7
Ці ж не такі ёсць пост, які Я выбраў: дзяліцца з галодным хлебам сваім, пускаць у дом бедных вандроўнікаў; апрануць голага, якога ўбачыш, і ад роднага свайго не хавацца?

К. Ахвяра Богу – гэта скрушаны дух.
Н. Не пагарджай, Божа, пакорным і прыгнечаным сэрцам.

МАЛІТВА

Божа, Ты наказаў нам утаймоўваць целы, каб вылечыць душы, дай, просім, каб маглі мы пазбегнуць усялякага граху і верна трымацца запаведзяў Тваёй любові. Праз Пана нашага Езуса Хрыста, Твайго Сына, які з Табою жыве і валадарыць у еднасці Духа Святога, Бог, праз усе вякі вечныя. Амэн.

К. Благаславім Пана.
Н. Дзякуем Пану Богу.

К. Божа, прыйдзі мне на дапамогу.
Н. Пане, паспяшы да мяне на паратунак.
Хвала Айцу і Сыну, і Духу Святому.
Як была спрадвеку, цяпер і заўсёды,
І на векі вечныя. Амэн.

ГІМН

Езу, Ты даў нам прыклад
Саракадзённага посту.
Дзеля душы ачышчэння
Раіш нам пост і ўстрыманне.

Будзь цяпер разам з Касцёлам,
Дапамажы ў пакаянні
Тым, хто, схіліўшы галовы,
Просіць зняць грэху цяжары.

Пане ласкавы і верны,
Выбач нам нашы правіны,
Тыя, што мы ўчынілі,
І захавай ад наступных.

Просім, каб праз пакаянне,
Што кожны год мы спаўняем,
Змаглі мы з чыстай душою
Пасху cвятую адзначыць.

Божа адзіны ў Тройцы,
Будзь праслаўлёны навекі.
З падзякай за дар прабачэння
Мы новую песню спяваем. Амэн.

ПСАЛЬМОДЫЯ

1 ант. Ты найпрыгажэйшы з сыноў чалавечых, * на вуснах Тваіх разлілася ласка.

Псальм 45 (44)
Заручыны караля

Вось жаніх! Выходзьце яму насустрач (Мц 25, 6)

І (2-10)

З майго сэрца выплывае добрае слова, †
я спяваю песню маю для караля. *
Мой язык як пяро спрытнага пісара.

Ты найпрыгажэйшы з сыноў чалавечых, †
на вуснах тваіх разлілася ласка, *
таму Бог благаславіў цябе навекі.

Прывяжы, магутны, да сцёгнаў сваіх меч, *
аздобу сваю і велічнасць.

У аздобе сваёй ідзі наперад †
і сядай на калясніцу за праўду, *
лагоднасць і справядлівасць.

Правіца твая *
пакажа табе цудоўныя справы.

Твае стрэлы вострыя, †
яны трапляюць у сэрцы ворагаў караля, *
народы ўпадуць перад табою.

Трон Твой, Божа, трывае навекі, *
справядлівае жазло – жазло Твайго валадарства.

Ты палюбіў справядлівасць і зненавідзеў беззаконне, †
таму намасціў цябе Бог, твой Бог, *
алеем радасці больш за супольнікаў тваіх.

Усе твае шаты – быццам міра, алоэ і касія, *
з палацаў са слановай косткі пацяшаюць цябе гуслі.

Дочкі караля сярод умілаваных тваіх. †
Каралева стала праваруч цябе, *
упрыгожаная золатам з Афіра.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

1 ант. Ты найпрыгажэйшы з сыноў чалавечых, * на вуснах Тваіх разлілася ласка.

2 ант. Вось Жаніх, * выходзьце Яму насустрач.

ІІ (11-18)

Паглядзі, дачка, паслухай і схілі сваё вуха, *
забудзь народ свой і дом твайго айца.

Кароль прагне тваёй прыгажосці, *
бо ён твой пан, пакланіся яму.

Дачка Тыру! Багатыя з народу *
прыносяць дары, каб здабыць тваю прыхільнасць.

Поўная славы выходзіць дачка караля. *
Адзенне яе вышыта золатам.

У вышытым адзенні вядуць яе да караля. *
За ёю дзяўчаты, сяброўкі яе, уваходзяць да яго.

Вядуць іх з радасцю і ў захапленні, *
уваходзяць яны ў каралеўскі палац.

Замест айцоў тваіх будуць твае сыны. *
Ты ўстановіш іх валадарамі па ўсёй зямлі.

Я зраблю тваё імя вядомым для ўсіх пакаленняў; *
таму народы будуць праслаўляць цябе на векі вечныя.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

2 ант. Вось Жаніх, * выходзьце Яму насустрач.

3 ант. Бог пастанавіў у паўнаце часу * аднавіць усё ў Хрысце.

Песня (Эф 1, 3-10)
Пра Бога Збаўцу

Благаслаўлёны Бог *
і Айцец Пана нашага Езуса Хрыста,

які благаславіў нас у Хрысце *
ўсялякім духоўным благаслаўленнем на нябёсах

i выбраў нас у Ім перад стварэннем свету, †
каб мы былі святымі і беззаганнымі *
перад Ім у любові.

Ён прадвызначыў нас для ўсынаўлення †
праз Езуса Хрыста, *
паводле ўпадабання сваёй волі,

дзеля хвалы сваёй праслаўленай ласкі, *
якою Ён адарыў нас ва Умілаваным.

У Ім мы маем адкупленне Ягонаю Крывёю, *
дараванне правінаў,

паводле багацця ласкі Ягонай, †
якою шчодра адарыў нас *
ва ўсялякай мудрасці і разуменні,

дазволіўшы нам пазнаць †
таямніцу сваёй волі, *
паводле свайго ўпадабання,

якое раней паклаў у Ім *
для спаўнення паўнаты часу,

каб аб’яднаць усё ў Хрысце: *
тое, што на нябёсах і на зямлі.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

3 ант. Бог пастанавіў у паўнаце часу * аднавіць усё ў Хрысце.

КАРОТКАЕ ЧЫТАННЕ Рым 12, 1-2
Прашу вас, браты, праз літасць Божую: аддайце вашыя целы на ахвяру жывую, святую, прыемную Богу – на разумнае служэнне вашае. І не дастасоўвайцеся да гэтага веку, але перамяняйцеся праз абнаўленне розуму вашага, каб вы пазналі, якая воля Божая, што добрае, прыемнае і дасканалае.

КАРОТКІ РЭСПАНСОРЫЙ
К. Я сказаў: * Пане, змілуйся нада мною.
Н. Я сказаў: * Пане, змілуйся нада мною.
К. Аздараві маю душу, бо я зграшыў перад Табою.
Н. Пане, змілуйся нада мною.
К. Хвала Айцу і Сыну, і Духу Святому.
Н. Я сказаў: * Пане, змілуйся нада мною.

ПЕСНЯ З ЕВАНГЕЛЛЯ

Ант. да песні Марыі: Не судзіце, каб вас не судзілі, * бо якім судом вы судзіце, такім і вас асудзяць, – / кажа Пан.

Песня Марыі (Лк 1, 46-55)
Радасць душы ў Пану

Велічае душа мая Пана, *
і ўзрадаваўся дух мой у Богу, маім Збаўцу,

бо глянуў Бог на пакору сваёй слугі. *
І цяпер благаслаўляць мяне будуць усе пакаленні.

Бо вялікае ўчыніў мне Усемагутны, *
а імя Яго святое.

І міласэрнасць Яго з пакалення ў пакаленне *
над тымі, хто Яго баіцца.

Паказаў моц сваёй правіцы, *
рассеяў тых, хто пыхлівы сэрцам.

Скінуў магутных з трону *
і ўзвысіў пакорных.

Дабром галодных насыціў, *
а багатых ні з чым адправіў.

Прыняў свайго слугу Ізраэля, *
памятаючы пра сваю міласэрнасць,

як абяцаў бацькам нашым - *
Абрагаму і яго патомству навекі.

Хвала Айцу і Сыну, *
І Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. да песні Марыі: Не судзіце, каб вас не судзілі, * бо якім судом вы судзіце, такім і вас асудзяць, – / кажа Пан.

ПРОСЬБЫ

З верай звяртаемся да Бога Айца, які абяцаў даць нам усё, аб чым мы згодна будзем прасіць у імя Сына Ягонага:
Пане, будзь міласцівы да свайго народу.

Пане, праз Хрыста Ты ўдасканаліў Закон, дадзены Майсею на гары Сінай,
– дай усім пазнаць гэты Закон, запісаны ў сэрцы, і захоўваць яго як запавет.

Дапамажы ўсім настаяцелям клапаціцца пра даручаных ім братоў,
– каб паміж імі наладзіліся шчырыя ўзаемаадносіны.

Умацоўвай сваёй сілай розум і сэрцы місіянераў
– і дай ім шматлікіх супрацоўнікаў.

Няхай штогод Твая ласка ўзрастае ў дзецях,
– а моладзь няхай сталее ў любові да Цябе і годных звычаях.

Памятай пра ўсіх нашых братоў, якія спачылі ў Табе,
– і зрабі іх саўдзельнікамі вечнага жыцця.

Ойча наш.

МАЛІТВА

Божа, Ты наказаў нам утаймоўваць целы, каб вылечыць душы, дай, просім, каб маглі мы пазбегнуць усялякага граху і верна трымацца запаведзяў Тваёй любові. Праз Пана нашага Езуса Хрыста, Твайго Сына, які з Табою жыве і валадарыць у еднасці Духа Святога, Бог, праз усе вякі вечныя. Амэн.

Потым, калі прысутнічае святар або дыякан, ён рассылае народ, кажучы:

Пан з вамі.
Н. І з духам тваім.
Няхай благаславіць вас Бог усемагутны, Айцец і Сын, і Дух Святы.
Н. Амэн.

Калі адбываецца рассыланне народу, дадаецца заклік:

Ідзіце ў супакоі Хрыста.
Н. Дзякуем Пану Богу.

Калі святар або дыякан адсутнічаюць ці калі Гадзіна чытаецца індывідуальна, то яна завяршаецца наступным чынам:

Няхай Пан благаславіць нас, абароніць ад усялякага зла і давядзе да жыцця вечнага.
Н. Амэн.

К. Божа, прыйдзі мне на дапамогу.
Н. Пане, паспяшы да мяне на паратунак.
Хвала Айцу і Сыну, і Духу Святому.
Як была спрадвеку, цяпер і заўсёды,
І на векі вечныя. Амэн.

Пасля гэтага пажадана зрабіць рахунак сумлення.

ГІМН

О Хрыстэ, Ты дзень поўны бляску,
Знішчаеш цемру начную.
Ў Табе пачатак святла ёсць,
І дорыш яго Ты абраным.

Таму Цябе вельмі просім:
Абарані нас ад злога,
І адары нас спакоем,
І сілы новыя дай нам.

Калі ўжо сон нас агорне,
Хай сэрца чувае з Табою,
І верных, што Цябе любяць,
Ты захавай сваёй моцай.

Зірні на нас, Божа і Пане,
Зруйнуй усе злыя намеры
І аддалі ўсе спакусы,
Бо нас Ты крывёй сваёй збавіў.

О Хрыстэ, Уладар Наймілейшы,
Цябе, як Айца, так і Духа,
Усё, што пад небам жывое,
Няхай праслаўляе бясконца. Амэн.

ПСАЛЬМОДЫЯ

Ант. Пане Божа, * Ты шматміласцівы і доўгацярплівы.

Псальм 86 (85)
Малітва беднага ў нядолі

Благаслаўлёны Бог, які суцяшае нас ва ўсякім смутку нашым (2 Кар 1, 3. 4)

Cхілі, Пане, сваё вуха і выслухай мяне, *
бо я бедны і ўбогі.

Захавай маю душу, бо я пабожны, †
збаў, мой Божа, Твайго слугу, *
які на Цябе спадзяецца.

Змілуйся нада мною, Пане, *
бо ўвесь дзень Цябе я клічу.

Узрадуй душу слугі Твайго, *
бо да Цябе, Пане, я ўзношу сваю душу.

Бо Ты, Пане, добры і выбачлівы, *
шматміласцівы да ўсіх, хто Цябе заклікае.

Пачуй, Пане, малітву маю, *
прыслухайся да голасу майго малення.

У дзень маёй нядолі я паклічу Цябе, *
бо Ты мне адкажаш.

Сярод багоў няма падобных да Цябе, Пане; *
няма нічога такога, як Твае справы.

Усе народы, створаныя Табою, †
прыйдуць і паклоняцца перад Тваім абліччам, Пане, *
і будуць праслаўляць імя Тваё.

Бо Ты вялікі і чыніш цуды, *
Ты – Бог, Ты адзіны.

Навучы мяне, Пане, шляху Твайму, †
каб хадзіў я ў праўдзе Тваёй; *
умацуй сэрца маё ў боязі перад іменем Тваім.

І буду ўсім сэрцам сваім †
славіць Цябе, Пане Божа мой, *
імя Тваё буду праслаўляць вечна.

Бо вялікая нада мною Твая міласэрнасць, *
Ты вызваліў душу маю з бяздоння адхлані.

Божа, узбунтаваліся супраць мяне ганарлівыя, †
і зграя пераследнікаў шукае майго жыцця, *
і не зважаюць яны на Цябе.

Але Ты, Пане, Бог міласэрны і ласкавы, *
шматміласцівы, доўгацярплівы і верны.

Паглядзі на мяне і змілуйся нада мною. †
Дай сілу Тваю слугу Твайму, *
уратуй сына сваёй слугі.

Пакажы на мне знак Тваёй дабрыні, *
каб убачылі гэта і тыя, што мяне ненавідзяць,

каб асаромеліся, *
бо Ты, Пане, дапамог мне і суцешыў мяне.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. Пане Божа, * Ты шматміласцівы і доўгацярплівы.

КАРОТКАЕ ЧЫТАННЕ 1 Тэс 5, 9-10
Бог прызначыў нас для атрымання збаўлення праз нашага Пана Езуса Хрыста, які памёр за нас, каб мы, жывыя ці мёртвыя, жылі разам з Ім.

К. У рукі Твае, Пане, * аддаю я дух мой.
Н. У рукі Твае, Пане, * аддаю я дух мой.
К. Ты нас адкупіў, Пане Божа верны.
Н. Аддаю я дух мой.
К. Хвала Айцу і Сыну, і Духу Святому.
Н. У рукі Твае, Пане, * аддаю я дух мой.

ПЕСНЯ З ЕВАНГЕЛЛЯ

Ант. Захавай нас, Пане, калі чуваем, * сцеражы падчас сну, / каб мы чувалі з Хрыстом / і адпачывалі ў супакоі.

Песня Сімяона (Лк 2, 29-32)
Хрыстус – святло народаў і хвала Ізраэля

Цяпер адпускаеш слугу Твайго, Валадару, *
паводле слова Твайго, у спакоі;

бо вочы мае ўбачылі збаўленне Тваё, *
якое падрыхтаваў Ты перад абліччам усіх народаў, 

святло для асвятлення язычнікаў *
і хвалу народу Твайго Ізраэля.

Хвала Айцу і Сыну, *
І Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. Захавай нас, Пане, калі чуваем, * сцеражы падчас сну, / каб мы чувалі з Хрыстом / і адпачывалі ў супакоі.

МАЛІТВА

Пане, дай нам збаўчы спакой і ўчыні, каб зерне нашай сённяшняй працы дало плён у вечнасці. Праз Хрыста, Пана нашага. Амэн.

Потым, нават тады, калі Камплета чытаецца індывідуальна, прамаўляецца благаслаўленне:

Ноч спакойную і смерць шчаслівую няхай дасць нам Бог усемагутны, Айцец і Сын, і Дух Святы.
Н. Амэн.

АНТЫФОНЫ НА ЗАКАНЧЭННЕ ДА НАЙСВЯЦЕЙШАЙ ПАННЫ МАРЫІ

Дзева, Маці Адкупіцеля,
брама раю нябеснага,
зорка мора й ратунак
для чалавека грэшнага.
Падтрымай люд знясілены,
што імкнецца да святасці,
Ты, што чынам дзівосным
нарадзіла Збавіцеля,
свайго святога Стварыцеля.
Прывітана анёлам, усесвятая Марыя,
барані нас ад грэху і за нас заступіся.

Або:

Вітай, неба Уладарка,
Вітай, Панна анёлаў,
Вітай, Ружа і Брама;
Яснасць свету дала Ты.
Цешся, Панна хвалебная,
Па­над усё прыгажэйшая,
Вітай, Маці нябесная;
Заступіся за нас Ты.

Або:

Вітай, Каралева,
Маці міласэрнасці,
жыццё, асалода і надзея наша, вітай!
Да Цябе звяртаемся мы, выгнаннікі, дзеці Евы.
Да Цябе ўздыхаем, стогнучы і плачучы
ў гэтай слёз даліне.
Дык звярні на нас, Заступніца наша,
Твае міласэрныя вочы.
І Езуса, благаславёны плод улоння Твайго,
з’яві нам пасля выгнання гэтага.
О ласкавая, о літасцівая,
о салодкая Панна Марыя.

Або:

Тваёй абароне аддаемся,
Святая Багародзіца,
У нашых патрэбах
Не пагарджай маленнем нашым.
І ад усялякай злой прыгоды
Выбаўляй нас заўсёды,
Панна хвалебная і благаслаўлёная.
О пані наша, Апякунка наша,
Суцяшальніца наша, Ты Заступніца наша,
З Сынам сваім нас паяднай,
Сыну свайму нас даручай,
Сыну свайму с аддавай.