Заклік з’яўляецца пачаткам штодзённай літургічнай малітвы. Ён папярэднічае Гадзіне чытанняў або Ютрані, у залежнасці ад таго, якая з гэтых літургічных гадзінаў распачынае малітву дня.

К. Пане, адкрый мае вусны.
Н. І вусны мае будуць абвяшчаць Тваю хвалу.

Ант. Прыйдзіце паклонімся Пану, / Каралю Апосталаў.

Псальм 95 (94)
Заахвочванне да праслаўлення Бога

Настаўляйце адзін аднаго штодня, пакуль можна казаць «сёння» (Гбр 3, 13) 

Прыйдзіце, заспяваем Пану, *
усклікнем Богу – скале нашага збаўлення.

Станем з падзякаю перад абліччам Ягоным, *
у песнях усклікнем Яму.

Ант. Прыйдзіце паклонімся Пану, / Каралю Апосталаў.

Таму што Бог – вялікі Пан *
і Валадар вялікі над усімі багамі,

у руцэ Ягонай глыбіні зямлі, *
і вяршыні гор – Ягоныя.

Мора належыць Яму, і Ён стварыў яго, *
і сушу стварылі Ягоныя рукі.

Ант. Прыйдзіце паклонімся Пану, / Каралю Апосталаў.

Прыйдзіце, паклонімся і ўпадзем, *
укленчым перад Панам, які нас стварыў.

Бо Ён – наш Бог, *
а мы – народ Ягонай пашы і авечкі рукі Ягонай.

Ант. Прыйдзіце паклонімся Пану, / Каралю Апосталаў.

О, каб вы паслухалі сёння Ягоны голас: †
«Не рабіце жорсткімі сэрцы вашыя, *
як у Мэрыбе, як на пустыні ў дзень Масы,

дзе Мяне спакушалі айцы вашыя, *
выпрабоўвалі Мяне, хоць і бачылі справы Мае.

Ант. Прыйдзіце паклонімся Пану, / Каралю Апосталаў.

Сорак гадоў выклікала агіду ўва Мне гэтае пакаленне, *
і Я сказаў: Гэта народ, які блукае сэрцам,

яны не пазналі Маіх дарог, †
таму пакляўся Я ў гневе сваім, *
што яны не ўвойдуць у Мой адпачынак».

Ант. Прыйдзіце паклонімся Пану, / Каралю Апосталаў.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. Прыйдзіце паклонімся Пану, / Каралю Апосталаў.

К. Божа, прыйдзі мне на дапамогу.
Н. Пане, паспяшы да мяне на паратунак.
Хвала Айцу і Сыну, і Духу Святому.
Як была спрадвеку, цяпер і заўсёды,
І на векі вечныя. Амэн. Аллелюя.

Пададзенае вышэй прапускаецца, калі гэтая Гадзіна чытаецца непасрэдна пасля Закліку.

ГІМН

Вось дзень шчаслівы Апосталаў свята,
Ззяннем сваім напаўняе нябёсы.
Вось Пётр і Павел у святасці і славе
Кроў за Хрыста сваю праліваюць.

Вось дзве алівы прад абліччам Пана,
Яркія светачы, правадыры Касцёла,
Ззяюць у небе з моцай вялікай,
Словам сваім адкрываюць нябёсы.

Хвала і пашана Айцу няхай будзе,
А Сыну Яго – моц і праслаўленне,
Хай будзе слава Духу суцяшэння,
Богу адзінаму ў Тройцы. Амэн.

ПСАЛЬМОДЫЯ

1 ант. Сымоне Пётр, калі любіш Мяне, * пасі авечак Маіх.

Псальм 19 (18), 2-7

Нябёсы абвяшчаюць Божую славу, *
пра справу рук Яго расказвае небасхіл.

Дзень дню апавядае слова, *
ноч ночы адкрывае веды.

Няма мовы, і няма слоў, *
але чуецца іх голас.

Па ўсёй зямлі разыходзіцца іх голас, †
і да межаў сусвету – словы іхнія; *
для сонца там шацёр у іх.

Як малады, яно выходзіць †
са свайго шлюбнага пакоя, *
радуецца, быццам асілак, які збіраецца бегчы.

Яно ўзыходзіць на адным краі неба, †
і бег ягоны – аж да другога краю, *
і нішто не схаваецца ад ягонага жару.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

1 ант. Сымоне Пётр, калі любіш Мяне, * пасі авечак Маіх.

2 ант. Для мяне жыццё – гэта Хрыстус, * а смерць – гэта выгада. / Ганаруся крыжам нашага Пана Езуса Хрыста.

Псальм 64 (63)

Пачуй, Божа, мой голас, калі я скарджуся; *
беражы маё жыццё ад страху перад ворагам.

Схавай мяне ад зграі злачынцаў, *
ад натоўпу тых, хто чыніць беззаконне.

Навастрылі, як меч, свае языкі, †
пусцілі, як стрэлы, свае атрутныя словы, *
каб страляць з засады ў нявіннага.

Яны страляюць у яго нечакана і не баяцца, *
цвёрда трымаюцца злой задумы.

Змаўляюцца тайна паставіць пасткі, *
кажучы: «Хто нас убачыць?»

Яны задумваюць несправядлівасць, *
дасканала абдумваюць яе.

Неспасцігальныя нутро кожнага чалавека *
і ягонае сэрца.

Але Бог пусціць у іх стралою, – †
і яны нечакана паранены будуць, *
язык іхні прывядзе іх да ўпадку.

Кожны, хто іх убачыць, затрасе галавою, *
і ўсе людзі будуць іх баяцца.

Яны абвесцяць справу Бога *
і зразумеюць Яго ўчынкі.

А справядлівы ўзрадуецца ў Пану †
і будзе шукаць прыбежышча ў Ім, *
і праславяцца ўсе праведныя сэрцам.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

2 ант. Для мяне жыццё – гэта Хрыстус, * а смерць – гэта выгада. / Ганаруся крыжам нашага Пана Езуса Хрыста.

3 ант. Пане, калі гэта Ты, * загадай мне ісці да Цябе па вадзе.

Псальм 97 (96)

Пан валадарыць! Няхай радуецца зямля, *
няхай весяляцца шматлікія выспы.

Воблака і цемра вакол Яго, *
справядлівасць і права – аснова Ягонага трона.

Агонь ідзе перад Ім *
і паглынае навокал ворагаў Ягоных.

Маланкі Ягоныя асвятляюць сусвет, *
зямля бачыць і дрыжыць.

Горы, як воск, растопяцца перад абліччам Пана, *
перад абліччам Пана ўсёй зямлі.

Нябёсы абвяшчаюць Яго справядлівасць, *
і ўсе народы бачаць Ягоную славу.

Няхай сорам спазнаюць усе, хто служыць ідалам, †
хто хваліцца бажкамі. *
Пакланіцеся Яму, усе багі.

Сіён чуе і весяліцца, *
і радуюцца дочкі Юды прысудам Тваім, Пане.

Бо Ты, Пане, найвышэйшы на ўсёй зямлі, *
вельмі ўзвялічаны над усімі багамі.

Пан любіць тых, хто зло ненавідзіць, †
Ён сцеражэ жыццё сваіх верных, *
з рук грэшнікаў ратуе іх.

Святло ззяе для справядлівага, *
і радасць – для праведных сэрцам.

Радуйцеся, справядлівыя, у Пану *
і дзякуйце на ўспамін Ягонай святасці.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

3 ант. Пане, калі гэта Ты, * загадай мне ісці да Цябе па вадзе.

К. Слова Пана трывае навекі.
Н. І гэтае слова абвяшчаецца вам як Добрая Навіна.

ПЕРШАЕ ЧЫТАННЕ
Пасланне св. Апостала Паўла да Галатаў 1, 15 – 2, 10

Сустрэча Пятра і Паўла ў Ерузалеме

Браты: Калі ж Бог, які выбраў мяне ад улоння маці маёй і паклікаў ласкаю сваёю, пажадаў аб’явіць праз мяне свайго Сына, каб я прапаведаваў Яго сярод язычнікаў, я не пачаў адразу раіцца з целам і крывёю і не пайшоў у Ерузалем да Апосталаў, маіх папярэднікаў, а пайшоў у Арабію і зноў вярнуўся ў Дамаск.

Пасля, праз тры гады, я пайшоў у Ерузалем наведаць Кефаса і прабыў у яго пятнаццаць дзён. Нікога ж іншага з Апосталаў я не бачыў, акрамя Якуба, брата Пана. У тым, што я пішу вам, Бог мне сведка, няма маны. Пасля гэтага адышоў я ў землі Сірыі і Кілікіі. Касцёлам Хрыстовым у Юдэі я не быў вядомы асабіста, яны толькі чулі, што той, хто быў іх ганіцелем, цяпер прапаведуе веру, якую некалі нішчыў. І праслаўлялі Бога за мяне.

Затым, праз чатырнаццаць гадоў я зноў пайшоў у Ерузалем з Барнабам, узяўшы з сабою і Ціта. А прыйшоў я пад уплывам аб’яўлення. І прадставіў ім Евангелле, якое прапаведую язычнікам; асобна для тых, хто мае пашану, каб не аказалася, што я бегаю ці бегаў дарэмна. Але нават Ціт, што быў са мною, які быў грэкам, не быў змушаны да абразання. Фальшывым жа братам, якія закраліся, каб парушыць свабоду нашую, якую маем у Езусе Хрысце, і каб мы трапілі зноў у няволю, мы не саступілі і не паддаліся ні на хвіліну, каб праўда Евангелля захавалася ў вас.

Тыя, хто мае пашану, – а кім калісьці былі, мяне не цікавіць, бо не зважае Бог на аблічча чалавека, – дык тыя, што маюць пашану, мне не пярэчылі. Але наадварот, убачыўшы, што мне даручана абвяшчэнне Евангелля сярод неабрэзаных, як Пятру – сярод абрэзаных (бо той, хто дапамагаў Пятру ў апостальстве абрэзаных, дапамагаў і мне сярод язычнікаў), і калі Якуб, Кефас і Ян, якіх лічаць стаўпамі, даведаліся пра дадзеную мне ласку, яны падалі мне і Барнабе правіцу на знак супольнасці, каб нам ісці да язычнікаў, а ім – да абрэзаных, каб толькі мы помнілі пра ўбогіх, і менавіта гэта я старанна рабіў.

РЭСПАНСОРЫЙ Мц 16, 18-19
Н. Ты – Пётр, скала, і на гэтай скале Я пабудую Касцёл Мой, і брамы пякельныя не перамогуць яго. * Я дам табе ключы Валадарства Нябеснага.
К. Што звяжаш на зямлі, тое будзе звязана ў небе, а што развяжаш на зямлі, тое будзе развязана ў небе.
Н. Я дам табе ключы Валадарства Нябеснага.

ДРУГОЕ ЧЫТАННЕ
Казанне св. Аўгустына, біскупа

(Sermo 295, 1-2. 4. 7-8: PL 38, 1348-1352)
Гэтыя мучанікі бачылі тое, што прапаведуюць

Сённяшні дзень асвячаны мучаніцтвам святых апосталаў Пятра і Паўла. Мы не кажам пра мала вядомых мучанікаў: «Па ўсёй зямлі разыходзяцца іх словы» (пар. Пс 19 [18], 5). Гэтыя мучанікі на ўласныя вочы бачылі тое, што прапаведавалі. Жылі ў справядлівасці, абвяшчаючы праўду і паміраючы за яе.

Св. Пётр, першы сярод Апостлаў, той, які шчыра любіў Хрыста, меў шчасце пачуць словы: «I Я кажу табе, што ты – Пётр» (Мц 16, 18). А раней сказаў ён: «Ты – Хрыстус, Сын Бога Жывога» (Мц 16, 16). А Хрыстус адказаў: «Ты – Пётр, скала, і на гэтай скале Я пабудую Касцёл Мой» (Мц 16, 18). На гэтай скале пабудуе веру, якую ты вызнаў. На вызнанні: «Ты – Хрыстус, Сын Бога Жывога», якое сказаў, пабудую Касцёл Мой. Бо ты – скала. Імя Пётр паходзіць ад слова «скала», не наадварот. Як імя Пётр паходзіць ад слова «скала», так ад імя Хрыста паходзіць і назва хрысціянін.

Пан Езус – як ведаеце – перад сваёй мукаю выбраў вучняў і назваў іх Апосталамі. Сярод іх толькі аднаму Пятру было дадзена не аднойчы ўвасабляць паўсюдны Касцёл, таму і пачуў ён словы: «Я дам табе ключы Валадарства Нябеснага» (Мц 16, 19). Ключы атрымаў не адзін чалавек, але адзін і паўсюдны Касцёл. Веліч Пятра вынікае з таго, што калі яму было сказана: «Я дам табе», ён выступаў ад імя аднаго і паўсюднага Касцёла. Таму ведайце, што гэта Касцёл атрымаў ключы Валадарства. Паслухайце, што ў іншымі месцы Пан сказаў усім Апосталам: «Прыміце Духа Святога. Каму адпусціце грахі, таму будуць адпушчаныя; на кім пакінеце, на тым застануцца» (Ян 20, 22-23).

Таму справядліва пасля свайго ўваскрасення Пан наказаў Пятру асабіста клапаціцца пра свае авечкі. Сярод вучняў не толькі ён адзін заслужыў на тое, каб пасвіць авечак Пана, бо Хрыстус прамаўляе да аднаго, каб падкрэсліць еднасць. Спачатку кажа Пятру, бо Пётр з’яўляецца першым сярод Апосталаў.

Не смуткуй, Апостал! Адкажы Пану раз, другі і трэці. Няхай тройчы пераможа вызнанне любові, бо празмерная ўпэўненасць была пераможаная тры разы страхам. Тры разы ты павінен развязваць тое, што тры разы завязаў. Развяжы любоўю, што завязаў страхам. Аднак Пан тройчы даручае сваіх авечак Пятру.

У адзін і той самы дзень мы ўшаноўваем мучаніцтва двух Апосталаў. Яны таксама стваралі адзінства. Пётр выйшаў першым. За ім пайшоў Павел. Адзначаем сёння ўрачыстасць Апосталаў, асвячаную іх уласнай крывёю. Будзем жа любіць іх веру, жыццё, працу, цярпенне, сведчанне і навуку.

РЭСПАНСОРЫЙ Лк 1, 76-77
Н. Святы апостал Павел, прапаведнік праўды і настаўнік народаў, * табе належыць пашана.
К. Праз цябе ўсе народы пазналі ласку Бога.
Н. Табе належыць пашана.

ГІМН

Цябе, Бога, праслаўляем,
Табе, Пане, хвала вечна.

Неба і зямля спявае
Табе, Ойча векавечны.

Табе, Божа, ўсе анёлы,
3 імі Моцы і Нябёсы,

Херубімы, cерафімы
Гімн хвалы адвечны ўзносяць.

Святы, Святы над святымі
Бог магутны і ласкавы,

Над зямлёй і небам слыне
Неабсяжнасць Тваёй славы.

I Апосталы, і вучні,
Хор прарокаў, поўны хвалы,

3 імі мучанікаў лучнасць
Аддаюць Табе пашану.

У сугучным хоры льецца
Па усёй зямлі наўкола

Табе хвала з нашых сэрцаў,
Спеў святы Твайго Касцёла.

Сына з Духам суцяшэння,
Велічы Айца прамністай

Праслаўляе ўсё стварэнне, –
Валадар хвалы Ты, Хрыстэ.

Каб жа выбавіць свет цэлы
Праз свае святыя раны,

Сын Айца спрадвечны, цела
Ты прыняў ва ўлонні Панны.

Зруйнаваў Ты брамы смерці,
На крыжы ёй вырваў джала,

Каб для ўсіх, хто ў Цябе верыць,
Радасць вечная заззяла.

Праваруч Айца, у славе
Трон Твой, Збаўца наш адзіны,

Прыйдзеш зноў адтуль у яве,
Каб судзіць людскія чыны.

Грэшным Ты не дай загінуць, –
Будзь нам Збаўцам, не Суддзёю

I абмый нас ад правінаў
Дарагой сваёй крывёю.

Са святымі, ў бляску моцы
Захавай Тваіх абраных,

Пане, збаў народ Твой, просім,
Благаслаў Тваіх падданых.

Гэтую апошнюю частку гімна можна па жаданні прапусціць.

Шляхам нас вядзі бяспечным
У нябесны Ерузалем.

Цябе, Валадар адвечны,
Мы штодзённа праслаўляем.

Праз вякі гучыць няспынна
Спеў, што славіць Твае справы.

Пане, ад усіх правінаў
Захаваць нас будзь ласкавы.

Не пакінь жа свайго люду,
Божа, без Тваёй апекі.

Пану веру, дык не буду
Асаромлены навекі.

МАЛІТВА

Пане, наш Божа, праз святых апосталаў Пятра і Паўла Ты даў свайму Касцёлу грунтоўныя асновы веры, праз іх заступніцтва дапамажы нам і прывядзі нас да вечнага збаўлення. Праз Пана нашага Езуса Хрыста, Твайго Сына, які з Табою жыве і валадарыць у еднасці Духа Святога, Бог, праз усе вякі вечныя. Амэн.

Потым, прынамсі пры супольнай цэлебрацыі, дадаецца акламацыя:

К. Благаславім Пана.
Н. Дзякуем Пану Богу.

К. Божа, прыйдзі мне на дапамогу.
Н. Пане, паспяшы да мяне на паратунак.
Хвала Айцу і Сыну, і Духу Святому.
Як была спрадвеку, цяпер і заўсёды,
І на векі вечныя. Амэн. Аллелюя.

Пададзенае вышэй прапускаецца, калі гэтая Гадзіна чытаецца непасрэдна пасля Закліку.

ГІМН

Смерць Апосталаў адважных
Дзень святым для нас зрабіла.
Мучаніцтва перамогай стала,
Славаю іх асвяціла.

Паяднала іх навекі
Кроў пралітая за веру.
Мужна ідучы за Богам,
Праўду сеялі ў свеце.

Першым сведчыў Пётр апостал,
Услед за ім – апостал Павел.
Сталіся прыладай Пана,
Узносячы святыні душаў.

Пётр дзеля пашаны крыжа
Смерць абраў уніз галавою,
Прыгадаўшы прадказанні,
Што пачуў ён з вуснаў Пана.

Вось у чым магутнасць Рыма –
Ў сведчанні такіх вызнаўцаў.
Умацаваны іх крывёю,
Ганарыцца ён іх славай.

У гэтым горадзе з’яднаны
Жыхары зямлі і неба.
Тут сталіца для народаў,
Трон настаўніка для свету.

Сёння просім Бога-Збаўцу
Каб дазволіў нам, нягодным,
Разам з пастырамі ўбачыць
Шчасце вечнае ў нябёсах. Амэн.

ПСАЛЬМОДЫЯ

1 ант. Ведаю, у каго паверыў, і перакананы, * што Ён мае моц / захаваць заруку маю на дзень суда.

Псальм 63 (62), 2-9
Душа, якая прагне Бога

Той з Богам, хто адкідае ўчынкі цемры

Божа, мой Божа, Цябе шукаю, *
Цябе прагне душа мая.

Маё цела па Табе тужыць *
у зямлі пустыннай, засохлай і бязводнай.

Так, у святыні я ўглядаюся ў Цябе, *
каб убачыць Тваю сілу і славу.

Бо міласэрнасць Твая лепшая за жыццё, *
вусны мае будуць хваліць Цябе.

Так, буду благаслаўляць Цябе ў маім жыцці *
і ўзнясу рукі ў імя Тваё.

Душа мая насычаецца, нібы тлушчам і тукам, *
і вусны мае славяць Цябе радасным спевам;

калі ўзгадваю Цябе на маім ложы, *
разважаю пра Цябе ў начную варту.

Бо Ты стаў маёй дапамогай, *
у цені крылаў Тваіх узрадуюся.

Да Цябе імкнецца душа мая, *
трымае мяне Твая правіца.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

1 ант. Ведаю, у каго паверыў, і перакананы, * што Ён мае моц / захаваць заруку маю на дзень суда.

2 ант. Ласка Божая, дадзеная мне, * не была дарэмнаю, / яна заўсёды са мною.

Песня (Дан 3, 57-88. 56)
Кожнае стварэнне хваліць Пана

Хваліце Бога нашага, усе Ягоныя слугі (Ап 19, 5)

Благаслаўляйце Пана, усе стварэнні Ягоныя, *
хваліце і ўзвялічвайце Яго навекі.

Нябёсы, благаслаўляйце Пана, *
благаслаўляйце Пана, анёлы Ягоныя.

Благаслаўляйце Пана, усе воды, што пад небам, *
няхай усялякая моц благаслаўляе Пана.

Благаслаўляйце Пана, сонца і месяц, *
благаслаўляйце Пана, нябесныя зоркі.

Благаслаўляйце Пана, усе дажджы і росы, *
благаслаўляйце Пана, усе вятры.

Благаслаўляйце Пана, агонь і спёка, *
благаслаўляйце Пана, холад і гарачыня.

Благаслаўляйце Пана, росы ды іней, *
благаслаўляйце Пана, мароз і холад.

Благаслаўляйце Пана, лёд і снег, *
благаслаўляйце Пана, дні і ночы.

Благаслаўляйце Пана, святло і цемра, *
благаслаўляйце Пана, маланкі і хмары.

Няхай зямля благаслаўляе Пана, *
няхай хваліць Яго і ўзвялічвае навекі.

Благаслаўляйце Пана, горы і ўзгоркі, *
благаслаўляйце Пана, усе расліны зямлі.

Благаслаўляйце Пана, крыніцы, *
благаслаўляйце Пана, моры і рэкі.

Благаслаўляйце Пана, кіты і ўсё, што плавае ў водах, *
благаслаўляйце Пана, усе нябесныя птушкі.

Благаслаўляйце Пана, усе звяры і жывёлы, *
благаслаўляйце Пана, чалавечыя сыны.

Няхай Ізраэль благаслаўляе Пана, *
хваліць і ўзвялічвае Яго навекі.

Благаслаўляйце Пана, святары Ягоныя, *
благаслаўляйце Пана, слугі Ягоныя.

Благаслаўляйце Пана, духі і душы справядлівых, *
благаслаўляйце Пана, святыя і пакорныя сэрцам.

Благаслаўляйце Пана, Ананія, Азарыя, Місаэль, *
хваліце і ўзвялічвайце Яго навекі.

Благаславім Айца і Сына, і Духа Святога, *
будзем хваліць і ўзвялічваць Яго навекі.

Благаслаўлёны Ты на скляпенні неба, *
годны хвалы і ўзвялічаны навекі.

2 ант. Ласка Божая, дадзеная мне, * не была дарэмнаю, / яна заўсёды са мною.

3 ант. У добрай барацьбе я змагаўся, * бег скончыў, веру захаваў.

Псальм 149
Радасць святых

Дзеці Касцёла, дзеці новага народу радуюцца свайму Валадару – Хрысту (Хезыхій)

Спявайце Пану новую песню, *
хвала Яму на сходзе святых.

Няхай радуецца Ізраэль у тым, хто яго стварыў, *
сыны Сіёна няхай цешацца ў сваім Валадары.

Няхай праслаўляюць імя Ягонае ў танцы, *
няхай зайграюць Яму на бубне і арфе.

Бо Пан любіць свой народ, *
пакорных карануе збаўленнем.

Няхай усклікаюць святыя ў славе, *
няхай радуюцца на ложах сваіх.

Пахвала Богу на іх вуснах, *
а двухбаковы меч – у іхніх руках,

каб адпомсціць язычнікам *
і пакараць народы;

каб звязаць ланцугамі іх каралёў, *
а вяльможаў іх скаваць у жалезныя кайданы,

каб здзейсніць над імі запісаны прысуд: *
такая хвала для ўсіх Ягоных святых.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

3 ант. У добрай барацьбе я змагаўся, * бег скончыў, веру захаваў.

КАРОТКАЕ ЧЫТАННЕ 1 П 4, 13-14
Умілаваныя, паколькі вы прымаеце ўдзел у муках Хрыстовых, радуйцеся, каб і ў час аб’яўлення славы Яго вы ўсцешыліся і ўзрадаваліся. Калі ганяць вас за імя Хрыста, то вы шчаслівыя, бо Дух славы і Дух Божы спачывае на вас.

КАРОТКІ РЭСПАНСОРЫЙ
К. Апосталы аддалі сваё жыццё * дзеля імя нашага Пана Езуса Хрыста.
Н. Апосталы аддалі сваё жыццё * дзеля імя нашага Пана Езуса Хрыста.
К. Радаваліся, што былі годныя цярпець.
Н. Дзеля імя нашага Пана Езуса Хрыста.
К. Хвала Айцу і Сыну, і Духу Святому.
Н. Апосталы аддалі сваё жыццё * дзеля імя нашага Пана Езуса Хрыста.

ПЕСНЯ З ЕВАНГЕЛЛЯ

Ант. да песні Захарыі: Сымон Пётр адказаў Езусу: * Пане, да каго мы пойдзем? / Ты маеш словы жыцця вечнага. / А мы паверылі і пазналі, што Ты Сын Божы, / аллелюя.

Песня Захарыі (Лк 1, 68-79)
Месія і Яго папярэднік

Благаслаўлёны Пан, Бог Ізраэля, *
бо наведаў і адкупіў народ свой,

і ўзняў моц збаўлення для нас *
у доме Давіда, слугі свайго.

Як абвясціў спрадвеку *
вуснамі сваіх святых прарокаў,

што збавіць нас ад ворагаў нашых *
і ад рук усіх, хто нас ненавідзіць.

Каб праявіць міласэрнасць да айцоў нашых *
і нагадаць пра святы запавет свой.

Прысягу, якую даў Абрагаму, айцу нашаму, *
дасць нам.

Каб, выбаўленыя з рук ворагаў, *
мы без страху служылі Яму

ў святасці і справядлівасці перад Ім *
ва ўсе дні нашыя.

А ты, дзіцятка, прарокам Найвышэйшага будзеш названа, *
бо пойдзеш прад абліччам Пана падрыхтаваць шляхі Яму,

каб даць народу Ягонаму пазнаць збаўленне *
праз адпушчэнне яго грахоў,

дзякуючы сардэчнай міласэрнасці нашага Бога,*
у якой наведаў нас Усход з вышыні;

каб асвятліць тых, *
хто сядзіць у цемры і ў цені смяротным;

каб накіраваць ногі нашыя *
на шлях спакою.

Хвала Айцу і Сыну, *
І Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. да песні Захарыі: Сымон Пётр адказаў Езусу: * Пане, да каго мы пойдзем? / Ты маеш словы жыцця вечнага. / А мы паверылі і пазналі, што Ты Сын Божы, / аллелюя.

ПРОСЬБЫ

З даверам узнясём нашыя просьбы да Хрыста, які пабудаваў свой Касцёл на фундаменце Апосталаў і прарокаў:
Хрыстэ, выслухай нас.

Ты маліўся за Пятра, каб не знікла яго вера,
– умацоўвай веру свайго Касцёла.

Ты пасля свайго ўваскрасення з’явіўся Сымону Пятру і аб’явіўся Саўлу,
– асвяці наш розум, каб мы сведчылі пра Тваё жыццё.

Ты выбраў апостала Паўла, каб ён абвяшчаў Тваё імя язычнікам,
– учыні нас сапраўднымі прапаведнікамі Твайго Евангелля.

Ты ў сваёй міласэрнасці прабачыў Пятра за здраду,
– даруй нам усе нашыя правіны.

Ойча наш.

МАЛІТВА

Пане, наш Божа, праз святых апосталаў Пятра і Паўла Ты даў свайму Касцёлу грунтоўныя асновы веры, праз іх заступніцтва дапамажы нам і прывядзі нас да вечнага збаўлення. Праз Пана нашага Езуса Хрыста, Твайго Сына, які з Табою жыве і валадарыць у еднасці Духа Святога, Бог, праз усе вякі вечныя. Амэн.

Потым, калі прысутнічае святар або дыякан, ён рассылае народ, кажучы:

Пан з вамі.
Н. І з духам тваім.
Няхай благаславіць вас Бог усемагутны, Айцец і Сын, і Дух Святы.
Н. Амэн.

Калі адбываецца рассыланне народу, дадаецца заклік:

Ідзіце ў супакоі Хрыста.
Н. Дзякуем Пану Богу.

Калі святар або дыякан адсутнічаюць ці калі Гадзіна чытаецца індывідуальна, то яна завяршаецца наступным чынам:

Няхай Пан благаславіць нас, абароніць ад усялякага зла і давядзе да жыцця вечнага.
Н. Амэн.

К. Божа, прыйдзі мне на дапамогу.
Н. Пане, паспяшы да мяне на паратунак.
Хвала Айцу і Сыну, і Духу Святому.
Як была спрадвеку, цяпер і заўсёды,
І на векі вечныя. Амэн. Аллелюя.

ГІМН

Цяпер мы заклікаем Духа,
Адзінага з Айцом і Сынам:
Прыйдзі і жыватворнай ласкай
Напоўні шчодра нашы сэрцы.

Пачуцці, вусны, розум, воля
Няхай абвесцяць Тваю славу.
Любоў няхай агнём палае,
А жар яе – абудзіць бліжніх.

Дай праз Цябе пазнаць Айца нам
І Сына, што з Яго паходзіць,
Каб шчырай верай вызнавалі,
Што Ты адзіны ў Святой Тройцы. Амэн.

ПСАЛЬМОДЫЯ

Ант. Калі Пётр казаў яшчэ гэтыя словы, * Дух Святы сышоў на ўсіх, хто слухаў яго, / і размаўлялі ўсе мовамі / і славілі Бога.

Псальм 120 (119)
Туга па спакоі

Ва ўціску будзьце цярплівыя, у малітве – трывалыя (Рым 12, 12)

Да Пана ўсклікаў я ў сваёй нядолі, *
і Ён пачуў мяне.

Пане, уратуй маё жыццё †
ад ілжывых вуснаў, *
ад падступнага языка.

Што дасць табе і што дадасць табе *
падступны язык?

Вострыя стрэлы ваяра, *
з ядлоўцу гарачыя вуглі.

Гора мне, што я знаходжуся ў Мэшэх, *
што жыву ў шатрах Кедара!

Занадта доўга мая душа была з тымі, *
хто ненавідзіць спакой.

Я – міралюбны, *
а толькі прамоўлю, яны – за вайну.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Псальм 121 (120)
Вартаўнік народу

Яны ўжо не будуць ні галадаць, ні прагнуць, і не будзе паліць іх сонца і ніякая спёка (Ап 7, 16)

Падымаю вочы свае да вышыняў: *
адкуль прыйдзе мая дапамога?

Дапамога мая ад Пана, *
які стварыў неба і зямлю.

Ён не дасць пахіснуцца назе тваёй, *
не задрэмле той, хто цябе сцеражэ.

Не дрэмле і не спіць *
той, хто сцеражэ Ізраэль.

Пан сцеражэ цябе, *
Пан – твой цень, Ён праваруч цябе.

Удзень сонца не ўдарыць цябе, *
ні месяц ноччу.

Пан захавае цябе ад усякага зла, *
будзе берагчы душу тваю.

Пан будзе сцерагчы выйсце тваё і вяртанне *
цяпер і навекі.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Псальм 122 (121)
Святы горад Ерузалем

Вы ж прыступіліся да гары Сіён і да горада Бога жывога, да нябеснага Ерузалема (Гбр 12, 22)

Узрадаваўся я, калі мне сказалі: *
«Пойдзем у дом Пана».

Вось стаяць нашыя ногі *
ў брамах тваіх, Ерузалем.

Ерузалем пабудаваны як горад, *
дзе ўсё злучана ў адно.

Туды ўзыходзяць пакаленні, пакаленні Пана, *
каб, паводле сведчання Ізраэля, праслаўляць імя Пана.

Там стаяць судовыя троны, *
троны дома Давіда.

Прасіце спакою для Ерузалема: *
«Няхай спакой маюць тыя, хто любіць Цябе.

Няхай будзе спакой у мурах Тваіх, *
дабрабыт у палацах Тваіх!»

Дзеля братоў маіх і бліжніх маіх *
скажу я: «Спакой табе!».

Дзеля дома Пана, Бога нашага, *
буду жадаць дабра табе.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. Калі Пётр казаў яшчэ гэтыя словы, * Дух Святы сышоў на ўсіх, хто слухаў яго, / і размаўлялі ўсе мовамі / і славілі Бога.

КАРОТКАЕ ЧЫТАННЕ Дз 15, 7b-9
Бог выбраў мяне сярод вас, каб язычнікі з маіх вуснаў пачулі слова Евангелля і паверылі. І Бог, які ведае сэрцы, засведчыў перад імі, даўшы ім, як і нам, Духа Святога. І не зрабіў ніякай розніцы паміж намі ды імі і праз веру ачысціў іхнія сэрцы.

К. Па ўсёй зямлі разышоўся іх голас.
Н. І да краёў зямлі – іхнія словы.

МАЛІТВА

Пане, наш Божа, праз святых апосталаў Пятра і Паўла Ты даў свайму Касцёлу грунтоўныя асновы веры, праз іх заступніцтва дапамажы нам і прывядзі нас да вечнага збаўлення. Праз Пана нашага Езуса Хрыста, Твайго Сына, які з Табою жыве і валадарыць у еднасці Духа Святога, Бог, праз усе вякі вечныя. Амэн.

К. Благаславім Пана.
Н. Дзякуем Пану Богу.

К. Божа, прыйдзі мне на дапамогу.
Н. Пане, паспяшы да мяне на паратунак.
Хвала Айцу і Сыну, і Духу Святому.
Як была спрадвеку, цяпер і заўсёды,
І на векі вечныя. Амэн. Аллелюя.

ГІМН

Божа, Валадар магутны,
Ты кіруеш зменай часу:
Раніцай даеш заранку
І апоўдні ззянне сонца.

Пагасі агонь нязгоды,
Астудзі спякоту гневу,
Прынясі здароўе целу
І спакой праўдзівы ў сэрцы.

Дай нам гэта, добры Ойча,
У адзінстве з Тваім Сынам,
Разам з Духам Суцяшэння,
Бо Ты валадарыш вечна. Амэн.

ПСАЛЬМОДЫЯ

Ант. Пётр каля шостай гадзіны * падняўся на дах дома памаліцца.

Псальм 123 (122)
Надзея народу – у Пану

Двое сляпых... пачалі крычаць: «Змілуйся над намі, Па­не, Сыне Давіда» (Мц 20, 30)

Да Цябе ўзнімаю свае вочы, *
які жывеш у нябёсах.

Так як вочы слугаў звернуты *
на рукі іх гаспадароў,

як вочы служанкі – *
на рукі яе гаспадыні,

так нашыя вочы – да Пана, Бога нашага, *
пакуль Ён не змілуецца над намі. 

Змілуйся над намі, змілуйся, о Пане, *
бо мы ўжо ўдосталь сытыя пагардай.

Душа наша насычана досыць *
здзекамі дзёрзкіх і пагардай ганарлівых.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Псальм 124 (123)
Дапамога наша – у імені Пана

Пан сказаў Паўлу: «Не бойся, таму што Я з табою» (Дз 18, 9-10)

Калі б Пан не быў з намі, – скажы, Ізраэль, – †
калі б Пан не быў з намі *
і людзі супраць нас паўсталі,

то яны праглынулі б нас жывымі, *
калі б распаліўся іх гнеў супраць нас.

Тады б залілі нас воды, †
паток прайшоў бы над намі, *
тады прайшлі б над намі бурлівыя воды.

Благаслаўлёны Пан, *
які не аддаў нас як здабычу для зубоў іхніх.

Душа наша, як птушка, *
вызвалілася з сіла лоўчых; 

сіло парвана, і мы ўратаваліся. †
Дапамога наша – у імені Пана, *
які стварыў неба і зямлю.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Псальм 125 (124)
Пан – Вартаўнік свайго народу

Спакой над Ізраэлем Божым (Гал 6, 16)

Тыя, хто спадзяецца на Пана, – як гара Сіён, *
якая не пахіснецца і будзе трываць навекі.

Як горы атачаюць Ерузалем, †
так Пан атачае свой народ *
адгэтуль і навекі.

Бо жазло беззаконных не будзе трываць *
над лёсам справядлівых,

каб справядлівыя не працягвалі *
рук сваіх да беззаконня.

Спрыяй, Пане, добрым *
і праведным сэрцам.

А тых, хто сыходзіць на крывыя шляхі, †
няхай Пан адвядзе разам са злачынцамі. *
Спакой Ізраэлю!

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. Пётр каля шостай гадзіны * падняўся на дах дома памаліцца.

КАРОТКАЕ ЧЫТАННЕ Гал 1, 15-16а. 17b-18а
Калі ж Бог, які выбраў мяне ад улоння маці маёй і паклікаў ласкаю сваёю, пажадаў аб’явіць праз мяне свайго Сына, каб я прапаведаваў Яго сярод язычнікаў, я пайшоў у Арабію і зноў вярнуўся ў Дамаск. Пасля, праз тры гады, я пайшоў у Ерузалем наведаць Кефаса.

К. Яны захоўвалі запаведзі Бога.
Н. І Ягоныя наказы.

МАЛІТВА

Пане, наш Божа, праз святых апосталаў Пятра і Паўла Ты даў свайму Касцёлу грунтоўныя асновы веры, праз іх заступніцтва дапамажы нам і прывядзі нас да вечнага збаўлення. Праз Пана нашага Езуса Хрыста, Твайго Сына, які з Табою жыве і валадарыць у еднасці Духа Святога, Бог, праз усе вякі вечныя. Амэн.

К. Благаславім Пана.
Н. Дзякуем Пану Богу.

К. Божа, прыйдзі мне на дапамогу.
Н. Пане, паспяшы да мяне на паратунак.
Хвала Айцу і Сыну, і Духу Святому.
Як была спрадвеку, цяпер і заўсёды,
І на векі вечныя. Амэн. Аллелюя.

ГІМН

Божа моцны, усё стварэнне
У Тваіх руках трывае.
Дзённага святла гадзінаў
Ты парадак вызначаеш.

Вечар наш напоўні ззяннем,
Каб святло жыцця не згасла,
І пасля зямной вандроўкі
Мы прыйшлі да вечнай славы.

Дай нам гэта, добры Ойча,
У адзінстве з Тваім Сынам,
Разам з Духам Суцяшэння,
Ты, што валадарыш вечна. Амэн.

ПСАЛЬМОДЫЯ

Ант. А дзевятай гадзіне * Пётр і Ян уваходзілі ў святыню на малітву.

Псальм 126 (125)
Радасць і надзея ў Богу

Вы супольнікі нашыя як у цярпеннях, так і ў суцяшэнні (2 Кар 1, 7)

Калі Пан перамяніў лёс Сіёна, *
мы былі, быццам у сне.

Вусны нашыя тады былі поўныя смеху, *

а язык спяваў з радасці.

Тады гаварылі між народамі: *
«Вялікія рэчы ўчыніў Пан для іх».

Вялікія рэчы ўчыніў Пан для нас, *
і мы ўзрадаваліся.

Змяні наш лёс, о Пане, *
як патокі на поўдзень.

Хто ў слязах сеяў, *
жаць будзе з радасцю.

Хто ідзе і плача, несучы насенне, каб сеяць, *
вернецца з радасцю, несучы снапы свае.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Псальм 127 (126)
Праца марная без Бога

Вы – будоўля Божая (1 Кар 3, 9)

Калі Пан не будуе дом, *
то будаўнікі працуюць дарэмна.

Калі Пан не пільнуе горад, *
то вартаўнікі дарэмна чуваюць.

Дарэмна, што вы рана ўстаеце, *
позна кладзецеся і хлеб ясце гаротны,

бо свайму ўмілаванаму * 
Ён дае гэта, калі той спіць.

Вось нашчадкі – спадчына ад Пана, *
а плод улоння – узнагарода.

Быццам стрэлы ў руцэ асілка, *
так сыны маладыя.

Шчаслівы той чалавек, *
які напоўніў імі свой калчан,

ён не будзе саромецца, *
калі будуць яны размаўляць з ворагам у браме.

Хвала Айцу і Сыну, *
    і Духу Святому.

Як была спрадвеку, цяпер і заўсёды, *
    і на векі вечныя. Амэн.

Псальм 128 (127)
Божае благаслаўленне дому

«Няхай благаславіць цябе Пан з Сіёна», гэта значыць з Касцёла свайго (Арнобій)

Шчаслівы кожны, хто баіцца Пана, *
хто ходзіць Ягонымі шляхамі.

Плён працы рук сваіх будзеш спажываць, *
будзеш шчаслівы і добра табе будзе. 

Жонка твая, як урадлівая вінаградная лаза *
ў сценах дому твайго.

Сыны твае, як аліўкавыя парасткі, *
вакол стала твайго.

Вось так будзе благаслаўлёны чалавек, *
які баіцца Пана. 

Няхай благаславіць цябе Пан з Сіёна, – †
і ты ўбачыш дабрабыт Ерузалема *
ва ўсе дні жыцця свайго. 

Убачыш патомства сыноў сваіх. *
Спакой над Ізраэлем.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. А дзевятай гадзіне * Пётр і Ян уваходзілі ў святыню на малітву.

КАРОТКАЕ ЧЫТАННЕ 2 Кар 4, 13-14
Маючы той самы дух веры, як напісана: Я паверыў, таму прамовіў, – і мы верым, таму і кажам, ведаючы, што той, хто ўваскрасіў Пана Езуса, і нас уваскрасіць разам з Езусам і паставіць перад сабою разам з вамі.

К. Радуйцеся і весяліцеся, – кажа Пан.
Н. Бо вашыя імёны запісаны ў нябёсах.

МАЛІТВА

Пане, наш Божа, праз святых апосталаў Пятра і Паўла Ты даў свайму Касцёлу грунтоўныя асновы веры, праз іх заступніцтва дапамажы нам і прывядзі нас да вечнага збаўлення. Праз Пана нашага Езуса Хрыста, Твайго Сына, які з Табою жыве і валадарыць у еднасці Духа Святога, Бог, праз усе вякі вечныя. Амэн.

К. Благаславім Пана.
Н. Дзякуем Пану Богу.

К. Божа, прыйдзі мне на дапамогу.
Н. Пане, паспяшы да мяне на паратунак.
Хвала Айцу і Сыну, і Духу Святому.
Як была спрадвеку, цяпер і заўсёды,
І на векі вечныя. Амэн. Аллелюя.

ГІМН

О Рым шчаслівы, ты славай яснееш
Крывёю пралітай Апосталаў слаўных.
Не веліч твая, але іх заслугі
Цябе ўзносяць над зямным сусветам.

Пятра і Паўла славяць усе народы
Нябёсы ззяюць перамогай веры,
Смерць мучанікаў адчыніла брамы
І шлях да вечнага жыцця ў небе.

Іх святасцю вызнаўцы ганарацца,
А мучаніцтва стала іх каронай,
І чырванню крыві сваёй пралітай
Яны здабылі славу для Касцёла.

Хвала Айцу няхай гучыць няспынна,
Адзінароднаму – хвала і панаванне,
Святому Духу – моц, пашана, слава
За дар Апосталаў вялікіх. Амэн.

ПСАЛЬМОДЫЯ

1 ант. Я папрасіў за цябе, Пётр, * каб не знікла твая вера. / І ты, калі вернешся, / умацуй братоў сваіх.

Псальм 116, 10-19 (115)

Я верыў нават тады, калі казаў: *
«Я моцна прыгнечаны».

Я сказаў у боязі сваёй: *
«Кожны чалавек – ілгун».

Чым аддзячу я Пану *
за ўсе Яго дабрадзействы для мяне?

Келіх збаўлення ўзніму *
і буду заклікаць імя Пана.

Выканаю свае абяцанні для Пана *
перад усім Яго народам.

Каштоўная ў вачах Пана *
смерць Яго святых.

Пане, я Твой слуга, †
Я слуга Твой, сын слугі Тваёй, *
Ты разарваў мае кайданы.

Я прынясу Табе ахвяру хвалы *
і буду заклікаць імя Пана.

Выканаю свае абяцанні для Пана *
перад усім Яго народам.

У дварах дома Пана, *
сярод цябе, Ерузалем.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

1 ант. Я папрасіў за цябе, Пётр, * каб не знікла твая вера. / І ты, калі вернешся, / умацуй братоў сваіх.

2 ант. Найбольш ахвотна буду хваліцца сваёй слабасцю, * каб жыла ўва мне моц Хрыста.

Псальм 126 (125)

Калі Пан перамяніў лёс Сіёна, *
мы былі, быццам у сне.

Вусны нашыя тады былі поўныя смеху, *
а язык спяваў з радасці.

Тады гаварылі між народамі: *
«Вялікія рэчы ўчыніў Пан для іх».

Вялікія рэчы ўчыніў Пан для нас, *
і мы ўзрадаваліся.

Змяні наш лёс, о Пане, *
як патокі на поўдзень.

Хто ў слязах сеяў, *
жаць будзе з радасцю.

Хто ідзе і плача, несучы насенне, каб сеяць, *
вернецца з радасцю, несучы снапы свае.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

2 ант. Найбольш ахвотна буду хваліцца сваёй слабасцю, * каб жыла ўва мне моц Хрыста.

3 ант. Пётр, ты – пастыр авечак Хрыстовых, * ты – галава Апосталаў, / табе даручаны ключы Валадарства Нябеснага.

Песня (Эф 1, 3-10)

Благаслаўлёны Бог *
і Айцец Пана нашага Езуса Хрыста,

які благаславіў нас у Хрысце *
ўсялякім духоўным благаслаўленнем на нябёсах

i выбраў нас у Ім перад стварэннем свету, †
каб мы былі святымі і беззаганнымі *
перад Ім у любові.

Ён прадвызначыў нас для ўсынаўлення †
праз Езуса Хрыста, *
паводле ўпадабання сваёй волі,

дзеля хвалы сваёй праслаўленай ласкі, *
якою Ён адарыў нас ва Умілаваным.

У Ім мы маем адкупленне Ягонаю крывёю, *
дараванне правінаў,

паводле багацця ласкі Ягонай, †
якою шчодра адарыў нас *
ва ўсялякай мудрасці і разуменні,

дазволіўшы нам пазнаць †
таямніцу сваёй волі, *
паводле свайго ўпадабання,

якое раней паклаў у Ім *
для спаўнення паўнаты часу,

каб аб’яднаць усё ў Хрысце: *
тое, што на нябёсах і на зямлі.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

3 ант. Пётр, ты – пастыр авечак Хрыстовых, * ты – галава Апосталаў, / табе даручаны ключы Валадарства Нябеснага.

КАРОТКАЕ ЧЫТАННЕ 1 Кар 15, 3-5. 8
Спачатку я перадаў вам тое, што і сам прыняў, што Хрыстус памёр за нашыя грахі паводле Пісання і што быў пахаваны і ўваскрос на трэці дзень паводле Пісання, і што з’явіўся Кефасу, а потым – Дванаццаці. Пазней за ўсіх з’явіўся і мне, як неданошанаму плоду.

КАРОТКІ РЭСПАНСОРЫЙ
К. Апосталы абвяшчалі слова Божае * з вялікай моцаю.
Н. Апосталы абвяшчалі слова Божае * з вялікай моцаю.
К. Сведчылі пра ўваскрасенне Хрыста.
Н. З вялікай моцаю.
К. Хвала Айцу і Сыну, і Духу Святому.
Н. Апосталы абвяшчалі слова Божае * з вялікай моцаю.

ПЕСНЯ З ЕВАНГЕЛЛЯ

Ант. да песні Марыі: Апостал Пётр і Павел, настаўнік народаў, * абвяшчалі нам, Пане, / Тваё Евангелле.

Песня Марыі (Лк 1, 46-55)
Радасць душы ў Пану

Велічае душа мая Пана, *
і ўзрадаваўся дух мой у Богу, маім Збаўцу,

бо глянуў Бог на пакору сваёй слугі. *
І цяпер благаслаўляць мяне будуць усе пакаленні.

Бо вялікае ўчыніў мне Усемагутны, *
а імя Яго святое.

І міласэрнасць Яго з пакалення ў пакаленне *
над тымі, хто Яго баіцца.

Паказаў моц сваёй правіцы, *
рассеяў тых, хто пыхлівы сэрцам.

Скінуў магутных з трону *
і ўзвысіў пакорных.

Дабром галодных насыціў, *
а багатых ні з чым адправіў.

Прыняў свайго слугу Ізраэля, *
памятаючы пра сваю міласэрнасць,

як абяцаў бацькам нашым - *
Абрагаму і яго патомству навекі.

Хвала Айцу і Сыну, *
І Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. да песні Марыі: Апостал Пётр і Павел, настаўнік народаў, * абвяшчалі нам, Пане, / Тваё Евангелле.

ПРОСЬБЫ

З даверам узнясём нашыя просьбы да Хрыста, які пабудаваў свой Касцёл на фундаменце Апосталаў і прарокаў:
Паспяшы на дапамогу свайму народу.

Ты паклікаў рыбака Сымона, каб стаў ён рыбаком людзей,
– пакліч шматлікіх працаўнікоў, каб збавіць усе народы.

Ты суцішыў буру на моры, каб не патануў човен вучняў,
– захавай Касцёл ад усялякага неспакою і ўмацуй нашага Папу.

Ты пасля ўваскрасення сабраў вакол Пятра сваіх рассеяных вучняў,
– Добры Пастыр, збяры ўвесь свой народ у адной аўчарні.

Ты паслаў апостала Паўла абвяшчаць Евангелле язычнікам,
– учыні, каб усе людзі пачулі слова збаўлення.

Ты даручыў свайму Касцёлу ключы ад Нябеснага Валадарства,
– адчыні брамы неба ўсім, хто пры жыцці спадзяваўся на Тваю міласэрнасць.

Ойча наш.

МАЛІТВА

Пане, наш Божа, праз святых апосталаў Пятра і Паўла Ты даў свайму Касцёлу грунтоўныя асновы веры, праз іх заступніцтва дапамажы нам і прывядзі нас да вечнага збаўлення. Праз Пана нашага Езуса Хрыста, Твайго Сына, які з Табою жыве і валадарыць у еднасці Духа Святога, Бог, праз усе вякі вечныя. Амэн.

Потым, калі прысутнічае святар або дыякан, ён рассылае народ, кажучы:

Пан з вамі.
Н. І з духам тваім.
Няхай благаславіць вас Бог усемагутны, Айцец і Сын, і Дух Святы.
Н. Амэн.

Калі адбываецца рассыланне народу, дадаецца заклік:

Ідзіце ў супакоі Хрыста.
Н. Дзякуем Пану Богу.

Калі святар або дыякан адсутнічаюць ці калі Гадзіна чытаецца індывідуальна, то яна завяршаецца наступным чынам:

Няхай Пан благаславіць нас, абароніць ад усялякага зла і давядзе да жыцця вечнага.
Н. Амэн.

К. Божа, прыйдзі мне на дапамогу.
Н. Пане, паспяшы да мяне на паратунак.
Хвала Айцу і Сыну, і Духу Святому.
Як была спрадвеку, цяпер і заўсёды,
І на векі вечныя. Амэн. Аллелюя.

Пасля гэтага пажадана зрабіць рахунак сумлення.

ГІМН

Цябе, Стварыцель сусвету,
Калі наступае змярканне,
З надзеяй ласкава просім:
Абараняй нас ад злога.

Напоўні сабой нашы сэрцы,
Няхай Цябе ноччу адчуюць.
Калі ж іх світанне абудзіць,
Няхай Цябе славяць у песні.

Хай цела адчуе бадзёрасць,
І дух хай абновіць натхненне.
А цемру начную асветліць
Твая незнішчальная яснасць.

Дай гэта нам, Ойча найлепшы,
Праз Езуса, нашага Пана,
Які валадарыць з Табою
І з Духам цяпер і навекі. Амэн.

ПСАЛЬМОДЫЯ

Ант. Схаваешся пад Ягонымі крыламі, * не будзеш баяцца страху начнога.

Псальм 91 (90)
Пад аховай Найвышэйшага

Вось Я даў вам уладу наступаць на змеяў і скарпіёнаў (Лк 10, 19)

Хто жыве пад аховаю Найвышэйшага *
і знаходзіцца ў цені Усемагутнага,

той скажа Пану: «Ты маё прыстанішча і мая цвярдыня, *
Божа мой, на Цябе спадзяюся».

Ён сам цябе вызваліць з сеткі паляўнічага *
і ад слова, што нясе пагібель.

Пер’ем сваім цябе ахіне, *
і ты схаваешся пад Ягонымі крыламі.

Не будзеш баяцца ні страху начнога, *
ні стралы, што ўдзень ляціць.

Ні заразы, што ходзіць у змроку, *
ні згубы, што знішчае апоўдні.

Тысяча ўпадзе збоку ад цябе, †
і дзесяць тысяч – праваруч цябе, *
але да цябе не наблізяцца.

Толькі паглядзіш вачыма сваімі – *
і ўбачыш адплату грэшнікам.

Бо Пана ты ўчыніў сваім прытулкам, *
Найвышэйшага – сваім жыллём.

Няшчасце не прыйдзе да цябе, *
і гора не наблізіцца да твайго шатра.

Бо анёлам сваім загадае наконт цябе, *
каб яны ахоўвалі цябе на ўсіх шляхах тваіх.

На руках цябе будуць насіць, *
каб не спатыкнуўся ты аб камень сваёй нагою.

Будзеш ступаць па львах і змеях *
і растопчаш ільвяня і цмока.

За тое, што ён палюбіў Мяне, уратую яго; *
абараню яго, бо ён пазнаў Маё імя.

Пакліча Мяне, – і адкажу яму, †
Я буду з ім ва ўціску, *
вызвалю яго і праслаўлю.

Даўжынёю дзён яго насычу *
і пакажу яму сваё збаўленне.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. Схаваешся пад Ягонымі крыламі, * не будзеш баяцца страху начнога.

КАРОТКАЕ ЧЫТАННЕ Ап 22, 4-5
І ўбачаць аблічча Пана, і імя Ягонае будзе на іх чолах. І ночы ўжо не будзе, і не будуць мець патрэбы ні ў святле лямпы, ні ў святле сонца, бо Пан Бог будзе свяціць над імі; і яны будуць валадарыць на векі вечныя.

К. У рукі Твае, Пане, * аддаю я дух мой.
Н. У рукі Твае, Пане, * аддаю я дух мой.
К. Ты нас адкупіў, Пане Божа верны.
Н. Аддаю я дух мой.
К. Хвала Айцу і Сыну, і Духу Святому.
Н. У рукі Твае, Пане, * аддаю я дух мой.

ПЕСНЯ З ЕВАНГЕЛЛЯ

Ант. Захавай нас, Пане, калі чуваем, * сцеражы падчас сну, / каб мы чувалі з Хрыстом / і адпачывалі ў супакоі.

Песня Сімяона (Лк 2, 29-32)
Хрыстус – святло народаў і хвала Ізраэля

Цяпер адпускаеш слугу Твайго, Валадару, *
паводле слова Твайго, у спакоі;

бо вочы мае ўбачылі збаўленне Тваё, *
якое падрыхтаваў Ты перад абліччам усіх народаў, 

святло для асвятлення язычнікаў *
і хвалу народу Твайго Ізраэля.

Хвала Айцу і Сыну, *
І Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. Захавай нас, Пане, калі чуваем, * сцеражы падчас сну, / каб мы чувалі з Хрыстом / і адпачывалі ў супакоі.

МАЛІТВА

Просім Цябе, Пане, наведай гэты дом і аддалі ад яго ўсе варожыя подступы. Няхай Твае святыя анёлы апякуюцца ім і захоўваюць нас у спакоі, а Тваё благаслаўленне няхай заўсёды будзе над намі. Праз Хрыста, Пана нашага. Амэн.

Потым, нават тады, калі Камплета чытаецца індывідуальна, прамаўляецца благаслаўленне:

Ноч спакойную і смерць шчаслівую няхай дасць нам Бог усемагутны, Айцец і Сын, і Дух Святы.
Н. Амэн.

АНТЫФОНЫ НА ЗАКАНЧЭННЕ ДА НАЙСВЯЦЕЙШАЙ ПАННЫ МАРЫІ

Дзева, Маці Адкупіцеля,
брама раю нябеснага,
зорка мора й ратунак
для чалавека грэшнага.
Падтрымай люд знясілены,
што імкнецца да святасці,
Ты, што чынам дзівосным
нарадзіла Збавіцеля,
свайго святога Стварыцеля.
Прывітана анёлам, усесвятая Марыя,
барані нас ад грэху і за нас заступіся.

Або:

Вітай, неба Уладарка,
Вітай, Панна анёлаў,
Вітай, Ружа і Брама;
Яснасць свету дала Ты.
Цешся, Панна хвалебная,
Па­над усё прыгажэйшая,
Вітай, Маці нябесная;
Заступіся за нас Ты.

Або:

Вітай, Каралева,
Маці міласэрнасці,
жыццё, асалода і надзея наша, вітай!
Да Цябе звяртаемся мы, выгнаннікі, дзеці Евы.
Да Цябе ўздыхаем, стогнучы і плачучы
ў гэтай слёз даліне.
Дык звярні на нас, Заступніца наша,
Твае міласэрныя вочы.
І Езуса, благаславёны плод улоння Твайго,
з’яві нам пасля выгнання гэтага.
О ласкавая, о літасцівая,
о салодкая Панна Марыя.

Або:

Тваёй абароне аддаемся,
Святая Багародзіца,
У нашых патрэбах
Не пагарджай маленнем нашым.
І ад усялякай злой прыгоды
Выбаўляй нас заўсёды,
Панна хвалебная і благаслаўлёная.
О пані наша, Апякунка наша,
Суцяшальніца наша, Ты Заступніца наша,
З Сынам сваім нас паяднай,
Сыну свайму нас даручай,
Сыну свайму с аддавай.